香港優步

出自維基百科,自由嘅百科全書
跳去導覽 跳去搵嘢

香港優步英文Uber Hong Kong)係優步由2014年6月開始喺香港提供嘅服務,而家有UberBLACK豪華房車、UberX、UberXL(前稱Uber7)、UberASSIST(關懷優步)、Uber Flash總共五類租車服務,又曾經推出過UberTAXI的士同埋全球首創嘅UberVAN客貨車

租車服務[編輯]

  • UberBLACK:租豪華房車
  • UberX:租普通房車,收費標準比UberBLACK平
  • UberXL:租容納到6位搭客嘅SUV,收費標準同UberBLACK
  • UberASSIST:對象係老人家同傷殘人士,租普通房車,收費標準同UberX
  • Uber Flash:租普通房車或者的士,收費標準同UberX
停咗嘅服務
  • UberTAXI:租的士,按的士咪錶收費
  • UberVAN:租客貨車運貨,收費標準同UberX

大眾評價[編輯]

優步喺香港帶來爭議性嘅討論。有市民認為優步對司機有一定要求,所以服務專業、有禮、可靠。但係,優步喺香港試過被警方指控,指涉嫌非法營運車輛。亦有的士公司向政府表達不滿。香港科技大學經濟系客座副教授徐家健話,擔心優步發展會令到的士司機營業市場下降,對的士不利[1]。有人亦認為,優步嘅運作模式同法律有所抵觸。

同時,有政界人士覺得優步對經濟有正面影響。民主黨律師,社區主任楊浩然話,透過流動應用程式(App)連接乘客同埋司機,可以為乘客提供更多交通選擇,亦都為司機帶來更多機會。又話,的士拒載、濫收車資等事件成日有,優步嘅出現只係迎合市場嘅需求[2]。亦有人覺得,政府應該制訂法律框架去迎合時代轉變,鼓勵創意並推動市場發展。上市公司行政總裁黃岳永認為,市民感受到嘅唔係政府「打擊罪案」嘅決心,而係對創新科技嘅拒絕態度同埋對既得利益者嘅盲目維護[3]

事件[編輯]

2015年8月11號,香港警方首次拘捕5名二十八至六十五歲嘅優步司機[4]。當日下晝,西九龍重案組探員到長沙灣貿易廣場嘅優步辦事處拘捕3名男職員,多部電腦亦被警方帶走調查。優步嗰晚回應話,會確保所有行程都有保險保障,每名Uber司機都必須通過全面背景審查。公司期待同當局通力合作,推動完善現行嘅法例,將乘客同司機嘅安全同埋利益放喺首位[5]

2015年12月4號,Uber香港正式推出價錢更大眾化嘅uberX[6]

2016年2月18號,Uber香港推出咗uberASSIST,為行動唔方便或者要額外幫助嘅乘客提供適合嘅輔助,方便老人家、孕婦、傷健人士去睇醫生、搵朋友、去旅行。[7]

2016年9月5號,Uber話希望集中資源喺共乘服務,所以暫停咗的士同貨Van嘅服務,UberBLACK(商務車)同UberX嘅服務就重喺度。 [8]

2016年10月14號,Uber推出咗UberEATS送餐服務,送餐服務服務開始喺港島北、中西區、灣仔、金鐘、半山等地方推行。 [9]

2016年12月1號,九龍城法院開審2015年8月放蛇行動中其中1人嘅案件,被裁定表證成立。[10]

2016年12月20號,三個司機唔滿意負責管理網上群組嘅姓林行家刪除咗有關司機追討Uber欠薪嘅影片,喺電動車叉電站抓頸同拳打腳踢對方。三個被告被判坐監。[11]

2016年12月22號,推出即時定價功能。輸入上車同落車地點,佢會預計行程嘅行車時間同距離,叫車時嘅供求及交通狀況嚟計算嗰次行程嘅實際車資。

2017年1月17號,搬入銅鑼灣禮頓中心高層9000呎新辦公室。

2019年3月5號,Uber香港推出咗Uber Flash,揀呢個服務會配對最近上車位置嘅 UberX 車或者的士畀個客,而收費標準就跟足UberX(同舊時UberTaxi嘅的士按錶收費唔一樣)。佢本嚟同的士車行天誠汽車合作,但啟用嗰日天誠汽車突然褪軚,只有零星嘅的士參與。[12]

[編輯]

  1. 徐家健 (2015-08-27). "的士牌大時代幾時玩完?". cwmgrouphk (英文). 原著喺2015-12-08歸檔. 喺2015-12-03搵到. Text "publisher=經濟3.0" ignored (help)
  2. 楊浩然 (2015-08-19). "Uber香港開打輿論戰". menclub (英文). Text " publisher=MenClub " ignored (help)
  3. 黃岳永 (2015-08-18). "Uber抵唔抵撐?". TheStandNews (英文). Text " publisher=thestandnews " ignored (help)
  4. now新聞台 (2015-08-11). "警方打擊違法出租車搜查Uber". NewsNow (英文). Text " publisher=newsnow " ignored (help)
  5. 商業電台 (2015-08-11). "5人涉駕白牌車被捕Uber稱確保行程有保險保障". YahooNewsHK (英文). Text " publisher=hkyahoonews " ignored (help)
  6. 蘋果日報 (2015-12-04). "Uber 推「uberASSIST」接載殘障人士". 蘋果日報. Text " publisher=蘋果日報 " ignored (help)
  7. iMoney智富雜誌 (2016-02-26). "Uber 推「uberASSIST」接載殘障人士". topick.hket. Text " publisher=topick.hket " ignored (help)
  8. 蘋果日報 (2016-08-30). "Uber香港下周一起暫停的士及貨van服務". 蘋果日報. Text " publisher=蘋果日報 " ignored (help)
  9. 蘋果日報 (2016-10-14). "UberEATS今送外賣 只限港島北". 蘋果日報. Text " publisher=蘋果日報 " ignored (help)
  10. 蘋果日報 (2016-12-09). "兩Uber司機認載客賺外快". 蘋果日報. Text " publisher=蘋果日報 " ignored (help)
  11. 星島日報 (2016-12-20). "三Uber司機圍毆行家判監". 星島日報. Text " publisher=星島日報 " ignored (help)
  12. Uber Flash上線 與車行合作觸礁 稱仍有的士參與 不按錶收費