香港圍村

香港嘅圍村（英文： Walled Villages ）多位於新界，主要分為「本地圍」同「客家圍」兩大類。「本地圍」係指本地人村落（即圍頭人），早於宋朝已有定居，明朝形成圍村。而「客家圍」係指清朝移入的客家人村落。

明朝時沿海寇患頻繁，沿海空虛而淪為寇穴，居民為求自保，喺村屋群周圍建矮石牆，用以抗盜，形成有圍牆保護嘅「圍村」。明朝時粉嶺龍躍頭嘅老圍就係香港最早嘅「本地圍村」。

「本地圍」所居住嘅係本地人（即圍頭人），每個家庭有獨立嘅房屋，四周建有高牆環繞。牆基採用大麻石鞏固，而牆身用青磚砌成，四邊嘅胸牆開有窗孔，圍內建築整齊，有明顯嘅中軸線，神廳設於末端挖掘護城壕溝，圍門係橫環鐵門或木條。

直到康熙時期，清朝政府頌佈遷界令，要求廣東沿海居民遷入內地，用以打壓明朝遺臣鄭成功喺台灣建立嘅明鄭王朝，斷絕中國東南沿海居民對其接濟。康熙八年（1669年）復界後，本地人獲准遷回沿海舊地，而喺呢個時期，客家人亦開始從內地嘅山區遷入香港，佢哋進入原屬圍頭原居民之地定居，但土客圍村仍各據一方。

乾隆嘉慶期間，客家居民遷居新界日多，漸漸喺本地人毗鄰建立新村定居，由於語言、風俗唔同而互生磨擦，加以土地分配利益不均，因而雙方產生土客械鬥，遂客家人就仿原居地山區圍龍屋型制，建造「圍屋」，聚族而居，用以械鬥防衛。

「客家圍」形制係主要由多間房屋組成嘅圍屋群，房屋牆身特厚而窗戶特細，部分橫屋嘅牆壁組成圍村嘅牆壁，圍屋四角設有炮樓（又名圍斗或瞭望台）