香港寒冷天氣警告
寒冷天氣警告 （英文：Cold Weather Warning；又叫寒警）係香港天氣寒冷或預料寒冷嗰陣（最低氣溫有12℃或以下），由香港天文台發出嘅警告信號。寒冷天氣警告系統獨立於其他氣象警告，例如強烈季候風信號、火災危險警告、霜凍警告同雷暴警告，呢啲警告可以同時生效，但唔會同同佢相反嘅警告——酷熱天氣警告同時生效。同山泥傾瀉警告、新界北部水浸特別報告，又或者暴雨警告信號同時生效嘅機會好微（但都有可能），因為香港嘅冬季唔係雨季，好少岀現惡劣天氣。寒冷天氣警告喺1999年制定。
發出寒冷天氣警告目的係及早提醒市民香港將會受到寒冷天氣影響，呼籲市民提高警惕，預防因嚴寒引起體溫過低。寒冷天氣警告發出後，信息會透過香港嘅電台、電視台同天文台網頁向市民廣播。若有需要，香港天文台仲會搞新聞發佈會，提醒市民去做適當措施。若果天氣持續寒冷，天文台會喺警告生效期間，繼續發出特別報告提醒市民應該注意嘅嘢。
而喺寒冷天氣警告設立前，天文台喺1993年設立過「安全使用氣體熱水爐預警」（Gas Heater Alert），並喺寒冷天氣出現嗰陣發出，去提醒市民用熱水爐嗰陣要保持空氣流通。但後嚟香港立法禁止喺浴室用無煙道式熱水爐，理論上已經唔會再發生浴室一氧化碳中毒嘅意外，所以警告後嚟被廢除，最後一次係喺2000年2月24號至3月2號發出。而而家寒冷天氣警告嘅天氣稿亦會不時提醒市民相關事項：「不論氣溫多少，當使用舊式氣體燃料熱水爐時，要確保室內有大量清新空氣」[1]。
雖然天文台定義「冬季」係每年12月到第二年2月，但因寒冷天氣亦會喺秋末或春初出現，所以以下「冬季」廣義上指每年11月到第二年4月。
寒冷天氣警告頻率同生效日數[編輯]
用年份去計[編輯]
用冬季去計[編輯]
|
寒冷天氣警告之最[編輯]
除非特別寫明，否則本文所有時間都係以UTC+8時間為準。
註：以下紀錄截至2020年。
- 生效時間最長：2008年1月24號15:00至2月18號09:30，持續594個半鐘（24日18個半鐘），同時亦係生效時間最長嘅單一天氣警告。（睇埋2008年港澳嘅持續寒潮）
- 生效時間最短：2016年1月18號04:45至11:45，持續7個鐘。
- 最多日數發出警告嘅冬季：2010至2011年冬季，有成53日發出。
- 最多次數發出警告嘅冬季：2011至2012年冬季，共發出10次。
- 最少日數同次數發出警告嘅冬季：2018至2019年冬季，只有6日同1次發出。
- 最多日數發出警告嘅年份：2011年，有成52日發出。
- 最多次數發出警告嘅年份：2005年同2014年，各有11次。（當中由前一年年尾發出到跨年生效並冇計入）
- 最少日數同次數發出警告嘅年份：2019年，只有7日同1次發出。（當中由前一年年尾發出到跨年生效並冇計入）
- 入冬以嚟最早兼第一次發出警告：2009年11月16號16:20至11月19號11:30，持續67個鐘10分鐘（2日19個鐘10分鐘），打破2008年11月28號最早出嘅寒冷天氣警告，亦係16年來首次喺11月中錄得低過12℃同第2次喺11月發出呢個警告。
- 入冬以嚟最晚首次發出警告：2007年12月30號16:20至2008年1月4號09:45，持續113個鐘25分鐘（4日17個鐘25分鐘）。
- 入冬以嚟最早末次發出警告：2018年12月28號20:00至2019年1月2號16:20，持續116個鐘20分鐘（4日20個鐘20分鐘）。
- 入冬以嚟最遲兼最尾一次發出警告：2007年4月3號21:30至4月4號11:45，持續14個鐘15分鐘。唯一一次喺4月發出呢個警告。
- 入冬以嚟最早兼第一次錄得寒冷天氣[2]：'1981年11月9號，錄得11.3℃。而寒冷天氣警告設立後就係2009年11月17號，錄得10.5℃。
- 入冬以嚟最晚首次錄得寒冷天氣[2]：2020年1月27號，錄得11.5℃。
- 入冬以嚟最早末次錄得寒冷天氣[2]：2019年1月1號，錄得11.4℃。
- 入冬以嚟最遲兼最尾一次錄得寒冷天氣[2]：1925年4月9號，錄得11.3℃。而寒冷天氣警告設立後就係2016年3月25號，錄得11.6℃。
- 入冬以嚟最早兼第一次錄得嚴寒天氣[3]：1922年11月26號，錄得6.5℃。而寒冷天氣警告設立後就係2010年12月17號，錄得5.8℃。
- 入冬以嚟最晚首次錄得嚴寒天氣[3]：1936年3月4號，錄得6.9℃。而寒冷天氣警告設立後就係2018年2月1號，錄得6.8℃。
- 入冬以嚟最早末次錄得嚴寒天氣[3]：1922年11月27號，錄得6.7℃。而寒冷天氣警告設立後就係2010年12月17號，錄得5.8℃。
- 入冬以嚟最遲兼最尾一次錄得嚴寒天氣[3]：1936年3月6號，錄得6.7℃。而寒冷天氣警告設立後就係2018年2月1號，錄得6.8℃。
- 天文台總部錄得嘅最低氣溫紀錄：1893年1月18號，錄得0℃。而寒冷天氣警告設立後就係2016年1月24號下晝3點40分，錄得3.1℃，亦係自1957年以嚟天文台錄得嘅最低氣溫，並列天文台總部設立以嚟嘅第3低溫，而嗰日大帽山仲錄得-6℃低溫，係香港境內歷年最低氣溫紀錄。（睇埋2016年北半球寒潮）
- 天文台總部錄得嘅「最低日最高氣溫」紀錄：1893年1月16號，錄得3.2℃。而寒冷天氣警告設立後就係2016年1月24號，錄得7.1℃。
- 天文台總部錄得嘅最低日平均氣溫紀錄：1893年1月16號，錄得1.8℃。而寒冷天氣警告設立後就係2016年1月24號，錄得4.9℃。
- 最多寒冷天氣日數嘅年份[2]：1967年，共有48日。而寒冷天氣警告設立後就係2008年，有成32日。
- 最少寒冷天氣日數嘅年份[2]：2019年，只有1日。
- 最多寒冷天氣日數嘅冬季[2]：1884至1885年冬季，有成51日。而寒冷天氣警告設立後就係2007至2008年冬季，有成32日。
- 最少寒冷天氣日數嘅冬季[2]：2018至2019年冬季，只有3日。
- 最長連續寒冷天氣日數紀錄[2]：1968年2月1號至2月27號，持續咗27日。而寒冷天氣警告設立後就係2008年1月24號至2月16號，持續咗24日。（睇埋2008年港澳嘅持續寒潮）
- 最多嚴寒天氣日數嘅年份[3]：1893年、1951年、1955年及1956年，各有6日。而寒冷天氣警告設立後就係2016年，共有3日。（睇埋2016年北半球寒潮）
- 最多嚴寒天氣日數嘅冬季[3]：1892至1893年、1950至1951年、1954至1955年、1973至1974年同1976至1977年冬季，各有7日。而寒冷天氣警告設立後就係2015至2016年冬季，有3日。（睇埋2016年北半球寒潮）
- 最長連續嚴寒天氣日數紀錄[3]：1893年1月14號至1月19號，持續咗6日。而寒冷天氣警告設立後就係2016年1月23號至1月25號，持續咗3日。（睇埋2016年北半球寒潮）
