香港小童群益會
香港小童群益會（英文：The Boys' and Girls' Clubs Association of Hong Kong，減筆BGCA），一般叫小童群益會，香港非牟利組織，主要照顧兒童同青少年。一九三六成立，初時照顧街童，二次大戰後重組。一九五一年七月廿七號正式登記為註冊團體，總會設喺灣仔駱克道三號，近軍器廠街。目前係香港兒童同青少年工作嘅非牟利組織之中，至具規模。
一般服務有兒童同青少年中心、圖書館，以及外展社工、駐校社工。西貢黃宜洲設有白普理營。
史
[編輯]一九三六年創會，至今遍及香港各地，會根據當時當地，以及兒童同青少年情況，提供合時需要服務。二十世紀卅年代，香港好多失學街童，流連街上，無適當照顧。小童群益會幫助呢啲細路發掘潛能，培育佢哋成為對社會有貢獻嘅人。有基本嘅識字班、技能培訓、互動遊戲，以及運動，同埋物資援助，提升佢哋嘅知識同技能、發揮天賦同培養興趣，幫佢哋踏入社會。
隨住時間流逝同埋香港社會嘅急速變化，小童群益會不斷變革。
小童群益會關注跨代貧窮問題。除咗調動額外嘅資源支援低收入家庭嘅兒童，重向政府同政策制定嘅人，倡議更多審視長遠解決貧窮問題嘅政策同方案。同時，又不斷拓展服務，向有發展障礙或者有特殊學習需要嘅兒童提供援助，促進社會對兒童同青少年精神健康嘅認知，並向有需要嘅家庭提供一站式、跨專業嘅精神健康同心理輔導服務。
服務宗旨
[編輯]四大服務宗旨：
- 關注兒童同青少年身心均衡發展
- 培育兒童同青少年成為對社會有貢獻嘅公民
- 加強家庭嘅功能
- 促進家長同社會人士對兒童同青少年嘅關注，特別係處於不利環境嘅組群；與服務對象同社會人士攜手為佢哋爭取應有嘅權利同福利
服務重點
[編輯]服務重點包括：
- 關注貧窮兒童
- 支援特殊學習需要兒童
- 關注兒童同青少年精神健康
- 鼓勵兒童社會參與
會歌
[編輯]看我們男女小童 團結一致氣勢虹
不避艱難與苦痛 振起精神向前衝
讀書遊戲做手工 相親相愛相幫忙
身體健康意志強 好為人類謀幸福
軼事
[編輯]好耐之前，呢間嘢會有擂台同拳套等等，借畀細孥仔運動式公平隻揪，於是坊間就興嗌佢花名小童群揪會嘞[2]。
攷
[編輯]- ↑ "80th Anniversary Scientific Conference" (PDF).
- ↑ 〈香港社會福利服務從業員協會〉。www.hkswea.org。喺2021-06-09搵到。
