香港魯警

香港魯警，又叫山東差，一般係講嚟自中國山東，特別係威海衛嘅香港警察。

史

1922年，香港警察第一次喺山東招請警察嚟香港執勤，並且喺1949年，亦即係中華人民共和國成立之後，停止喺山東招請警察。但有部分祖籍山東嘅警察，喺1950年至抵達香港。

英國人喺威海衛請差人嘅原因，一方面威海衛租借畀英國，另一方面，英國人發現山東人體型高大健碩，民風純樸，所以請大批壯丁嚟香港做警察。

請人

通常到山東請人嗰陣，會由一位外籍警員，同埋兩三位本地教官，再加一位識山東話同英文嘅翻譯去到當地請人，要求係身高有五呎七吋，重要體格健碩，據掌故文獻講，外籍教官會摸申請人隻手，手粗通常會比較容易申請成功。之後，就會喺當地受訓，然後嚟香港執勤。而學歷，就無特定要求，只係讀咗三年書都得。

待遇

由於魯警唔識英文同廣東話，所以佢哋有自己嘅警號，以及有專門服待佢哋嘅廚師。每服務三年，就可以放大假三個月，方便返鄉下探親，有好多重要順便喺鄉下娶埋老婆嚟香港。喺1950年，新嚟嘅警員，月薪有120蚊港紙。

雖然魯警唔識英文，但不少人都熱衷學英文，日後重因此晉升到警長。

邊度執勤

最初魯警被派到新界偏僻地區、交通部、港島山頂警區，同一啲英國商船執勤。佢哋駐守山頂，因為本地華籍警察唔識英文，而外籍人士比較鍾意性格單純，又體格大隻嘅魯警。而佢哋體格比較好，亦適合喺來往香港同中國大陸之間嘅英國商船上駐守，擔任保安工作。

後嚟，呢啲魯警重喺郵政局、立法局、港督府以至衝鋒隊執行任務。