高琳琳九日命日記事件

喺高琳琳九日命日記事件中，事件主角係一個女嬰——高琳琳，因患咗先天性橫膈膜疝氣而夭折，父母將經過編成《九日生命日記》放上網誌，引嚟超過40萬瀏覽人次同1.05萬個回應留言，事件至2006年12月底被香港傳媒廣泛報導，並引起香港社會迴響。

事件經過

高琳琳喺2006年10月7號出世，出世9日後（即10月15號）逝世。父母二人都係基督教徒，阿爸高展鵬喺殘障學校中提供復康服務，阿媽陳文琪就喺香港大學言語治療學系任教。而《九天生命日記》主要由高展鵬撰寫，詳細記載將女出世第一日至到第九日死嘅過程，高展鵬喺個女出世滿月（即係佢出世後大概1個月）將日記放上網誌，並喺2個月同2個半月後寫咗兩篇後記。

事件由陳文琪有咗大概5個月開始，一次超聲波檢查發現胎兒患上罕見嘅先天性橫膈膜疝氣，胃因為橫膈膜出現細窿而上移，影響心、肺發展，威脅胎兒生命。然而，父母拒絕中止懷孕，並生咗個女。

2006年中秋節（10月6號），陳文琪有咗7個半月，喺例行產前檢查間，發現胎兒出現肺積水同心臟衰竭情況，要開肚生。第二日（10月7號），高琳琳出世，體重得三磅，冇喊過，同時全身發紫。因身體虛弱，隨即被送入深切治療部，喺氧氣箱內維持生命。

10月11號，醫生斷定高琳琳病情轉趨穩定，即時做手術，目標係將上移嘅胃拉下修補，並接駁腸道到肛門。然而，經過5個鐘，手術失敗，醫生建議同佢拔喉，將痛苦減到最低，父母唔答應。10月12號，父母安排個女喺深切治療部進行浸禮。父母最終接納醫生建議，喺第九日（10月15號）畀醫生拔除維生喉管，高琳琳喺出世後第九日結束生命。2006年11月6號，父母為高琳琳舉行安息禮。

陳文琪喺產後兩個幾月返香港大學言語治療學系重新回復教學職務。對於生個女嘅決定，她稱不後悔：「就算得千萬分之一機會，我都會畀佢嘗試創造生命奇蹟。」父母肯定咁話個女係上天帶來嘅最豐厚禮物，唔後悔同佢相聚九日，並稱日後會再生孩子，並會同細路講佢只排第二，重有一個家姐叫「琳琳」。