魔術快斗角色一覽

出自維基百科,自由嘅百科全書
跳去導覽 跳去搵嘢

呢版係講響魔術快斗嘅角色。

黑羽一家[編輯]

  • 黑羽快斗(黒羽 快斗/くろば かいと Kuroba Kaito)/怪盜基德(怪盗キッド/かいとうキッド Kaitō Kiddo)
配音:山口勝平(日本);官志宏/魏伯勤/曹冀魯(台灣)
魔術快斗男主角,鍾意玩魔術,因為老豆黑羽盜一響八年前神秘死亡,佢為咗查到老豆係點死而成為第二代怪盜基德,國際犯罪代號係1412,花名「世紀末嘅魔術師」同埋「月光下嘅魔術師」。佢嘅主要道具係一支啤牌槍,但係佢好驚,如果佢冇用道具,滑雪都係麻麻。佢打扮同埋舉止夠嗮紳士,但有時都會好鍾意玩。經常失驚無神咁發出預告信,話到明自己幾時偷、要偷啲咩,玩到班差佬氹氹轉,但係佢唔會造成任何傷亡,所以佢響日本有好多Fans。佢一直都好努力咁想揾到可以長生不老嘅寶石「潘朵拉」,所以佢偷嘅嘢多數都係鑽石,不過佢偷完之後又會還返畀人。
佢同江戶川柯南係對手,重同新一(即柯南)撞樣,而佢本人就鍾意同班同學中森青子,而青子就同小蘭撞樣。
  • 黑羽盜一(黒羽 盗一/くろば とういち Kuroba Tōichi)
配音:池田秀一(日本);徐健春/吳文民(台灣)
主角快斗嘅老豆,千影老公,係世界頂級魔術師,另一個身份係怪盜基德。響八年前因為阻止一個神秘組織偷寶石「潘朵拉」,所以畀個班人響佢一次表演上面暗殺,重畀佢哋扮做意外。到依家人又唔見條屍又唔見。
同新一老豆優作係對手,重同佢撞樣,而優作雖然好多次幫班差佬捉佢,但係始終都捉唔到。另外,除咗獨仔快斗之外,佢重有兩個徒弟,分別係優作老婆有希子同埋黑暗組織女骨幹苦艾酒,而有希子嘅徒弟就係FBI搜查官赤井秀一
  • 黑羽千影(黒羽 千影/くろば ちかげ Kuroba Chikage)/怪盜淑女(怪盗淑女/ファントム・レディ Phantom Lady)
配音:富澤美智惠(日本);蔣篤慧/魏晶琦(台灣)
主角快斗嘅阿媽,盜一老婆,另一個身份係好出名、昭和年代二十面相神偷怪盜淑女,響十八年前因為有人冒充佢個名而去巴黎,響黑羽盜一嘅幫助底下,成功逃離呢個畀人設計、想暗殺佢嘅一個陷阱,之後佢就同盜一結婚同埋隱退。依家響美國拉斯維加斯度打工。

中森一家[編輯]

  • 中森青子(中森 青子/なかもり あおこ Nakamori Aoko)
配音:岩居由希子/高山南/藤村步/M·A·O(日本);林佑俽/姚敏敏/陶敏嫻/楊凱凱(台灣)
魔術快斗女主角,係男主角快斗嘅同班同學,性格好動善良,係專門負責捉基德嘅警部中森銀三個獨女,因為基德經常玩到佢老豆氹氹轉,所以佢好憎基德,但係佢就鍾意住快斗。佢同小蘭撞樣。
  • 中森銀三(中森 銀三/なかもり ぎんぞう Nakamori Ginzō)
配音:石塚運昇/石井康嗣(日本);劉傑/孫中台/徐健春/曹冀魯(台灣)
警視廳搜查二課智能罪犯搜查系警部,中森青子老豆,由黑羽盜一時代就己經開始負責捉怪盜基德。因為經常畀基德玩到佢氹氹轉,所以佢嘅目標就係要捉到基德,甚至可以為咗捉到佢而唔理其他案件。因為佢有權力調動差佬同埋裝甲車、直升機,所以佢次次捉基德嘅時候都會敲鑼打鼓,但係次次畀基德玩到狼狽而歸。
同小蘭老豆小五郎有少少似樣。