鹹肉菜飯

鹹肉菜飯係江南地區幾流行嘅飯餸

鹹肉菜飯係江浙地區一款飯餸。發源地唔知係邊，但係上海賣鹹肉菜飯嘅餐廳多數都打住「徽州」或者「黃山」招牌。呢一味飯，係將青菜同鹹肉整碎，落米一齊煮熟變成飯，配鹹肉湯或者骨湯，幾惹味，符合吳越地區口味。

做法

1. 鹹肉一嚿（要預先浸開），青菜適量。
2. 鹹肉切粒，青菜切條（梗切細條啲，葉切大條啲）。
3. 生薑斬成沫，用少少水浸一浸。（鹹肉有一陣鹹肉嘅腥氣，所以要用薑去辟味）。
4. （至關鍵一步）鑊度唔使畀油，開中火，炒鹹肉，炒到乾身、鬆起。灑啲生薑水、兩羹油，繼續炒，炒到鹹肉好勻旬噉上晒油之後，開大火，落菜，翻炒幾下（千祈唔好炒得太耐炒到啲菜熛晒水）。淋啲油即可。
5. 長粒糯米同普通米一比一比例撈埋，洗乾淨。將炒好嘅鹹肉同米、剩低嘅生薑水撈勻。
6. 水嘅比例要把握好，因為青菜仲會熛水，所以落水落到啱好浸過米面就夠，唔使驚啲飯硬。用電飯煲個話，煮熟跳掣之後，焗10分鐘就得。

睇埋

• 菜飯