麥當勞叔叔

石圍角邨麥當勞叔叔塑像

麥當勞叔叔

麥當勞叔叔係麥當勞連鎖快餐店嘅招牌吉祥物，官方英文名叫做Ronald McDonald，隨住麥當勞全球多個地方都有分店，麥當勞叔叔唔單止係美式快餐文化嘅象徵標誌之一，甚至有研究指出麥當勞叔叔嘅形象知名度位列全球第二（僅次於聖誕老人）。

不過而家麥當勞叔叔喺好多地方都陸續消失，而家全香港只剩返荃灣石圍角邨一間麥當勞重有麥當勞叔叔塑像喺度。

形象

麥當勞叔叔嘅官方形象設定，係個樣似小丑嘅人物，髮形係紅色嘅爆炸頭，笑口常開，身着鮮黃色嘅連身工作衫同紅色嘅大短靴，底衫同襪都係紅白間條樣式。伴隨住麥當勞公司全球化嘅經營方針，麥當勞叔叔重設定識得講31種語言。此外，作為麥當勞公司用嚟吸引細路嘅主要虛擬角色，因此官方將麥當勞叔叔設定為「細路最好嘅朋友」，同一班各具特色嘅朋友永遠喺麥當勞樂園（McDonaldland）歡迎細路嘅光臨，並自2003年8月開始擔任麥當勞公司嘅「首席歡樂官」（Chief Happiness Officer，CHO）。

由來

麥當勞叔叔係一位拉脫維亞人麥克·波拉科夫斯（Michael Polakovs）所創造嘅角色。麥克·波拉科夫斯本來係個喺美國受歡迎嘅馬戲團小丑，1966年麥當勞邀請佢創作能夠代表公司嘅人物（Ronald McDonald），成功塑造咗眾所皆知嘅麥當勞叔叔。 2009年12月6號，麥克·波拉科夫斯以86歲高齡喺美國離世 。