麪

拉麪

麪（俗寫麵）係用麪粉整出來嘅食物。佢係將麪粉加水搓成麪粉糰，再用唔同方法整到一條。麪可以有唔同粗幼、厚薄、圓扁、曲直。麪主要成份係麥，而另一種米整出嘅呢，就叫做粉。不過有時啲人撈亂，例如意大利粉其實係麪來嘅。咁麪有好多種，全蛋麪、蝦子麪、烏冬、冷麪等等。有時麪會整到佢乾晒，等佢可以儲耐啲，要用嗰陣就加水。

傳統中式麪都係拉出來嘅，亦都有刀或者其他架生切到一條條。

起源

咁多年來，一直都有爭論麪係中國、阿剌伯定係意大利發明。而最早嘅記載，係追到公元25年到220年之間嘅後漢時期。2005年10月12號，響中國青海民和縣喇家村發現咗四千年前反轉咗嘅一碗麪。證實中國係最先有麪嘅地方。不過呢隻麪唔係用麥整成，而係用粟。