黃埔村

黃埔村，係舊底廣東番禺縣茭塘司彬社嘅一條村，而家屬廣州市海珠區琶洲街道。條村喺琶洲島東邊，同長洲隔江對望，南邊隔黃埔涌對崙頭洪安圍。黃埔舊名叫鳳浦、凰洲，夾埋就係「凰浦」，收尾變咗叫「黃埔」。北宋經已開村，明清兩代係泊外埠商船嘅港口。而家分屬四行政村：黃埔、石基、楊青、新洲。世居村民姓梁、胡、馮、羅，仲有關、黃、衛、陳呢啲細姓。