黑澤明
| 黑澤明 | |||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|
 | |||||||||||||||||||
| 導演 | |||||||||||||||||||
| 國籍 |  日本 | ||||||||||||||||||
| 出世 | 1910年3月23號 日本東京府荏原郡大井町 （今東京都品川區） | ||||||||||||||||||
| 死 | 1998年9月6號（88歲） 日本東京都世田谷區 | ||||||||||||||||||
| 職業 | 導演、監製、編劇 | ||||||||||||||||||
| 配偶 | 矢口陽子（1935年－1985年結婚） | ||||||||||||||||||
| 仔女 | 大仔：黒澤久雄（1945—） 大女：黒澤和子（1954—） | ||||||||||||||||||
| 父母 | 父：黑澤勇（秋田縣人） 母：黑澤志麻（大阪人） | ||||||||||||||||||
| 屋企人 | 姊：茂代、春代、種代、百代（早夭） 兄：昌康、茂康（早夭）、丙午 | ||||||||||||||||||
| |||||||||||||||||||
黑澤明（1910年3月23號—1998年9月6號）係日本電影導演，執導過30套電影，代表作有《羅生門》、《七俠四義》、《用心棒》、《天國與地獄》、《德爾蘇烏扎拉》、《影武者》同《亂》。
黑澤明喺1936年加入咗日本電影業，之前佢短暫做過畫家。做咗幾年副導演同編劇之後，佢喺第二次世界大戰期間憑住受歡迎嘅動作片《姿三四郎》（1943年）首次執導。戰後，佢執導嘅《酩酊天使》（1948年）大受好評，佢喺呢套戲度起用當時仲未出名嘅演員三船敏郎做主角，確立咗佢作為日本最重要新進導演之一嘅地位。之後佢哋兩個仲會再合作多15套電影。
《羅生門》（1950年）喺東京首映，出乎意料咁贏得咗1951年威尼斯影展嘅金獅獎。呢套戲喺商業同評論方面嘅成功，首次為日本電影業打開咗西方電影市場嘅大門，亦因此令其他日本電影人獲得國際認同。喺1950年代同1960年代初期，黑澤明每年大約執導一套戲，當中有幾套備受推崇（而且經常被翻拍）嘅作品，包括《留芳頌》（1952年）、《七俠四義》（1954年）、《蜘蛛巢城》（1957年）、《武士勤王記》（1958年）、《用心棒》（1961年）、《天國與地獄》（1963年）同《赤鬍子》（1965年）。1960年代之後，佢嘅作品量大幅減少；不過，佢後期嘅作品——包括佢最後兩套電影《影武者》（1980年）同《亂》（1985年）——仍然獲得高度讚賞。
1990年，佢接受咗奧斯卡金像獎頒發嘅終身成就獎。佢逝世之後，被《AsianWeek》雜誌同CNN評選為「藝術、文學同文化」類別嘅「世紀亞洲人」，被譽為20世紀為亞洲發展作出最顯著貢獻嘅五個人之一。佢嘅事業受到好多回顧展、評論研究同傳記嘅表揚，呢啲包括印刷同影像形式，仲有好多消費者媒體嘅發行。
生平
[編輯] |
童年到戰爭年代（1910年－1945年）
[編輯]早年生活（1910年－1935年）
[編輯]黑澤明喺明治43年（1910年）3月23日出世[1]，喺東京荏原郡大井町（現東京品川區東大井三丁目）。佢老豆黑澤勇（1864年－1948年）係來自秋田縣嘅武士家庭，喺陸軍體育學院中學擔任校長。佢阿媽志麻(シマ)（1870年－1952年）就來自大阪嘅商人家庭。[2]佢係家中八兄弟姐妹（茂代、昌康、忠康（夭折）、春代、種代、百代、丙午）中排名第八，亦係最細嘅一個。佢出世嗰陣，家裡面已經有兩個大咗嘅兄姊出身離家，一個已經過身，所以佢係同三個家姐同一個哥哥一齊大。[2][3]
黑澤勇除咗重視體育運動之外，仲接受西方文化，認為戲劇同電影都有教育價值。佢鼓勵細路仔睇電影；黑澤明六歲嗰陣就開始睇電影。[4]立川精治係佢小學老師，對佢影響好大。立川老師嘅先進教育方法令年輕嘅阿黑羅先係愛上畫畫，之後又對教育產生興趣。[5]喺呢段時間，黑澤明仲學習咗書法同劍道。[6]
另一個對佢童年影響好大嘅人就係佢大四年嘅哥哥黑澤丙午（1906年－1933年）。喺大正12年（1923年）關東大地震同之後嘅慘劇之後，丙午帶住13歲嘅黑澤明去睇隅田川災難現場。當黑澤明想避開周圍堆積如山嘅人同動物屍體嗰陣，丙午唔畀佢咁做，反而鼓勵黑澤明勇敢面對。有啲評論家認為呢件事影響咗黑澤明之後嘅藝術生涯，因為佢作為導演好少會逃避喺作品中直面不快嘅真相。[7][8]喺1920年代後期，丙午成為東京淺草一流館、大勝館同神樂坂Cinema Palace (シネマ・パレス)[9]嘅默片電影解說員[10]，常為外國默片做解說工作，而一心想成為畫家嘅黑澤明[11]，亦係此時投靠丙午，兩兄弟形影不離。[12][13]
喺丙午嘅薰陶下，黑澤明唔只睇電影，仲經常去睇舞台劇同馬戲表演。[14] 同時，佢矢志畫畫為生，但係佢好快發現無法靠畫畫維生，漸漸失去對畫作嘅熱情。[15] 1930年代初，有聲電影興起，原本替電影解說嘅丙午逐漸冇工開，黑澤明惟有返去同父母住。 1933年7月，丙午自殺。四個月後，黑澤明嘅大哥昌康亦都病死埋，屋企剩低3個姐姐，同埋家中唯一在生男丁黑澤明。[12][16]
投身影業 (1935 - 1945)
[編輯]
昭和十一年(1936年)，P.C.L.映画製作所（之後同東宝合併）招考助監督（副導演），黑澤明走去報考，獲得名導演山本嘉次郎嘅賞識。於是乎，1936年2月，年介25歲嘅黑澤明正式入行。[17][18]山本嘉次郎又教導黑澤明話好導演要懂得寫劇本。[19]佢後來既為自己嘅電影編劇或者同人合編劇本，亦有為其他導演編寫劇本，直至1960年代。[20][21]
1942年底，小說家富田常雄出咗本受到宮本武藏啟發嘅柔道小說《姿三四郎》，廣告吸引咗黑澤明。小說一出版黑澤明就買咗本書，一口氣睇晒，即刻叫東寶搶版權。黑澤明嘅直覺啱嘅，冇幾日，另外三間大日本片廠都嚟搶。東寶拎咗，黑澤明就開始籌備佢嘅導演處女作。[22][23]
《姿三四郎》喺1942年12月喺橫濱實地開拍。製作過程好順利，但成片過審就好難搞。審查處認為呢部電影喺戰時日本嘅標準嚟講太「英美」，最後要靠導演小津安二郎出面讚好呢部戲，《姿三四郎》先至喺1943年3月25日獲准上映。（黑澤明剛剛33歲。）呢部電影喺口碑同票房都好成功。不過，審查處之後決定剪走大約18分鐘嘅鏡頭，而家呢啲片段大部分都認為冇晒。[24][25]
佢之後轉去拍戰時女工嘅題材，拍咗部半紀錄片式嘅宣傳片《最美》，喺1944年初開拍。為咗令女演員嘅演出更真實，導演要佢哋喺拍攝期間住喺真嘅工廠，食工廠嘅飯，仲要互相用戲中角色嘅名嚟叫。佢之後喺成個事業生涯都會用類似嘅方法嚟對待演員。[26][27]
製作期間，飾演工廠女工領袖嘅矢口陽子俾同事推選出嚟向導演提出訴求。佢同黑澤明成日拗撬，但就係因為咁樣爭拗，兩個人反而變得親密。佢哋喺1945年5月21日結婚，當時矢口已經有兩個月身孕（佢冇再繼續做演員），兩公婆一直喺埋一齊，直到1985年佢過身為止。[28][29]佢哋有兩個仔女，截至2018年[update]都仲在生：兒子久雄，1945年12月20日出世，做過佢阿爸最後幾部作品嘅監製；和子係佢個女，1954年4月29日出世，做咗服裝設計師。[30]
喺結婚之前唔耐，黑澤明俾片廠逼住要拍佢處女作嘅續集。《姿三四郎續集》喺1945年5月首映，成日露骨到明顯嘅宣傳意味，一般認為係佢最弱嘅作品之一。[31][32][33]
黑澤明決定寫個劇本，既啱審查又唔使咁貴。《踩虎尾的男人》改編自歌舞伎劇《勸進帳》，由黑澤明做副導演時期經常合作嘅喜劇演員円谷英二主演，喺1945年9月完成。呢個時候，日本已經投降，盟總時期開始咗。新嚟嘅美國審查員覺得呢部戲宣揚嘅價值觀太「封建」，禁咗呢部戲。直到1952年先至上映，同年黑澤另一部戲《留芳頌》都上咗。諷刺嘅係，拍緊嘅時候，日本戰時審查員已經批評呢部戲太西化同「民主」（佢哋特別唔鍾意円谷英二飾演嘅搞笑扈從），所以就算戰爭繼續落去過咗完成日期，呢部戲都好大可能見唔到天日。[34][35]
戰後初期到《赤鬍子》（1946－1965）
[編輯]戰後初期（1946－1950）
[編輯]1946年，黑澤明拍咗《我對青春無悔》，靈感嚟自1933年嘅瀧川事件同戰時間諜尾崎秀實嘅案件，批評日本戰前政權嘅政治壓迫。[註 1] 同佢以前嘅作品唔同，呢次英雄主角係個女人，祐紀（原節子），佢出身喺中產家庭，開始質疑自己嘅價值觀。原本嘅劇本要大幅重寫，因為主題有爭議加上主角係女性，呢部電影俾評論界嘅評價好兩極。雖然係咁，觀眾都幾鍾意，仲將戲名改到變成戰後嘅流行語。[37]
佢下一部電影《美好的星期天》喺1947年7月首映，評價好參差。呢係一個比較簡單同感性嘅愛情故事，講一對窮苦嘅戰後情侶喺戰後頹垣敗瓦嘅東京，點樣享受佢哋一星期一次嘅假期。呢部戲受到法蘭克·卡普拉、D·W·格里菲斯同F·W·茂瑙嘅影響，全部都係黑澤明最鍾意嘅導演。[38][39] 1947年仲有一部同黑澤明有關嘅電影上映，係動作冒險驚慄片《雪の果て》，由谷口千吉執導，黑澤明寫劇本。呢部戲係激烈嘅年輕演員三船敏郎嘅處女作。黑澤明同佢嘅導師山本出面說服東寶簽下三船敏郎，因為喺試鏡嘅時候，呢個後生仔深深打動咗黑澤明，但得罪咗大部分其他評審。[40]
《酩酊天使》經常被認為係導演嘅第一部重要作品。[41] 雖然劇本同黑澤明所有佔領時期嘅作品一樣，要經過美國審查員重寫，但黑澤明覺得呢係佢第一次可以自由表達自己嘅電影。呢個講一個醫生試圖救一個患有肺癆嘅黑幫（極道）嘅硬淨故仔，都係黑澤明第一次同三船敏郎合作。之後黑澤明接下來16部電影入面，除咗《留芳頌》之外，三船敏郎都係演重要角色。雖然三船喺《酩酊天使》入面唔係主角，但佢爆炸性嘅演出令黑幫角色喺劇中成為焦點，喧賓奪主咗本來由志村喬飾演嘅主角醉鬼醫生。（志村之前已經演過好幾套黑澤明嘅戲。）不過，黑澤明唔想壓抑呢個後生演員嘅無窮活力，三船敏郎嘅反叛角色震撼咗觀眾，就好似幾年之後馬龍白蘭度嘅反抗態度會震撼美國觀眾一樣。[42] 呢部戲喺1948年4月喺東京首映，得到好評如潮，仲俾有威望嘅《電影旬報》影評人選為年度最佳電影，係黑澤三部獲得呢個榮譽嘅電影之一。[43][44][45][46]
《酩酊天使》拍完之後，東寶陷入咗一場持續幾個月嘅勞資糾紛，東寶工會佔領咗片廠。當東寶管理層唔再俾員工人工嗰陣，黑澤組織咗一個巡迴戲班嚟籌錢，導演安東·契訶夫嘅《求婚》，仲有一個由三船同志村主演嘅《酩酊天使》改編版。[47] 黑澤明因為東寶員工之間嘅分裂同暴力、東寶管理層嘅陰謀手段，仲有警察同軍方圍捕打破佔領嘅行為而感到幻滅，離開咗東寶。佢之後回想：「我明白到我以為係我屋企嘅片廠其實係屬於陌生人嘅。」[48]
黑澤明同監製本木莊二郎、好友兼導演山本嘉次郎、成瀨巳喜男同谷口千吉組成咗一個新嘅獨立製作單位，叫做「映畫藝術協會」。為咗呢個組織嘅處女作，亦係同角川映畫合作嘅第一部電影，黑澤明揀咗菊田一夫嘅當代舞台劇，同谷口一齊改編成電影劇本。《靜靜的決鬥》由三船敏郎飾演一個患有梅毒嘅理想主義年輕醫生，呢係黑澤刻意要打破三船成日俾人定型做黑幫嘅嘗試。呢部戲喺1949年3月上映，票房好好，但通常都被認為係導演較次要嘅作品。[49][50][51][52]1949年，佢仲幫映畫藝術協會拍咗松竹出品嘅《野良犬》，一個關於警察尋找失槍嘅故事。[53]呢齣戲亦都係黑澤明同編劇菊島隆三首度合作，展開8次合作之旅。片中一段長達8分鐘無對白拍攝片中警察尋找失槍的片段，展視咗戰後東京滿目瘡痍嘅境況。[54][55][56]
松竹出品嘅《醜聞》喺1950年4月公映，黑澤明試圖揉合法庭戲同埋社會議題（言論自由與個人責任之間嘅矛盾），但即使黑澤明自己亦承認電影焦點唔集中，係佢唔太滿意之作。[57]
蜚聲國際 (1950 - 1952)
[編輯]拍完《醜聞》後，大映搵黑澤明拍下一部電影。黑澤明起用編劇橋本忍，展開佢兩個長達9次的合作。黑澤同橋本決定改編芥川龍之介嘅短篇小說《竹藪中》而成《羅生門》，而大映因為電影成本低，樂於支持拍攝。[58]電影喺1950年8月25號響東京帝国劇場首映，然後全國公映。最初影評唔算太熱烈，而票房收入尚算唔錯。[59][60][61]
當年，一位駐日嘅意大利電影公司代表Giuliana Stramigioli睇過《羅生門》後驚為天人，極力向大映推薦，促成大映將《羅生門》參展威尼斯國際電影節。1951年9月10號，《羅生門》獲頒影展最高榮譽「金獅獎」。呢次得獎唔單止令大映喜出望外，更是震撼整個電影世界，皆因當年外國對日本電影業一無所知。[62]大映之後響洛杉磯短暫放映配上字幕的版本，獲得曾經製作《金剛》(1933)同《大國民》(1941)嘅RKO公司放手一搏買入美國發行權。在影評大讚下，《羅生門》喺紐約一間戲院頭三週的票房錄得3萬5千美元收入，喺當時嚟講算喺高收。[63]
1951年，黑澤明改篇帝俄時代杜斯托也夫斯基著名小說拍成《白痴》。電影原本版本片長265分鐘，但被電影公司刪剪成166分鐘上映。被大幅刪剪的版本被影評大彈，但有原節子領銜主演下，票房收入又唔算差。[64][65][66][67]
重返東宝 (1953 - 1959)
[編輯]
喺國際影壇聲名鵲起後，黑澤明重返佢老東家東宝拍攝《留芳頌》。故仔改編自俄國作家托爾斯泰嘅小說《伊凡．伊里奇之死》，由志村喬飾演一個患咗胃癌嘅東京官僚，拼盡全力喺臨終前追尋人生意義。[68]劇本方面，黑澤明搵咗橋本忍同小國英雄（小國英雄自此幫黑澤明12齣電影做編劇）負責編劇，故事以略帶戲㖸語調，諷刺日本官僚制度，又配上美國流行歌曲，展示當年日本受美國文化影響，令影片有別於一般通俗劇，甚至有評論將佢同德國劇作家布萊希特作比較。電影喺1952年10月公映，名利雙收，贏得電影旬報最佳電影等獎項，亦被後世視為經典電影之一。[69][70][71]
.jpg)
1952年12月，黑澤明拉埋橋本忍同小國英雄，花咗45日編寫佢下一齣電影《七俠四義》嘅劇本，亦係黑澤明第一齣劍劇。[72]故事講述日本戰國時代農民聘用武士抵抗山賊。電影人物眾多，高潮迭起，足足長成三個半鐘頭。電影前期工作準備咗三個月，排戲亦足足一個月，而拍攝日子多達148日，屢因製作、財政問題，以及黑澤明嘅健康狀況時拍時停，拍攝橫跨咗成年，令電影成為當年日本製作費最昂責嘅電影。電影公映即大獲好評，兼且票房大賣。極速回本之後，電影公司將影片發行海外，廣受讚譽，而且歷久不衰。[72][73][74][75]
1954年，黑澤明開拍《活人的紀錄》，講述一個工廠老闆因為害怕受核子戰爭影響，而帶住全家移居巴西農場嘅故事。完成拍攝，後期製作期間，黑澤明好友兼配樂師早坂文雄病逝，享年41歲。配樂工作要交由早坂嘅徒弟佐藤勝負責，佐藤之後合共為黑澤明8齣電影配樂。1955年，電影公映時口啤唔太理想，亦成為黑澤明首齣票房失收嘅電影。多年後，影評認為呢齣電影喺反映人類對核戰威脅嘅其中一部佳作之一。[76][77][78]
之後，黑澤明改編莎士比亞四大悲劇之一《馬克白》，但係時代背景就改成日本戰國時代嘅《蜘蛛巢城》。片中，黑澤明要求演員（如山田五十鈴）以能劇方式演出，就當作係演出改編日本著作嘅電影，而唔係演出英語名著。電影喺1957年1月公映。電影係日本國內風評較導演前作略佳，而在海外就被視為重要嘅莎劇改編電影。[79][80][81][82]
緊接而來，黑澤明喺1957年五六月期間，改編俄國大文豪高爾基劇作《底層》成為佢以日本江戶時代做背景嘅電影《低下層》。電影喺1957年9月公映，評價同《蜘蛛巢城》時差無幾，但有啲評論就讚賞佢係黑澤明最被低估嘅作品。[83][84][85][86]
黑澤明喺《七俠四義》之後嘅三齣電影，都唔能夠好似《七》片咁「迷倒」日本觀眾。呢幾齣戲嘅調子都偏向悲觀同暗黑，反覆探討個人盡義以得到救贖嘅命題，其中以《蜘蛛巢城》同《低下層》最顯而易見，同當年日本開始進入經濟奇蹟時代，平民生活大為改善嘅氣氛牛頭唔搭馬咀。黑澤明發現呢個問題後，就改拍調子相對輕鬆、娛樂性更強，亦更適合掌年方興未艾嘅寛銀幕嘅電影《武士勤王記》。這齣動作連場嘅冒險故事，講述一個將軍以及兩個農民護送領主女兒，跨越敵對勢力範圍回家。電影喺1958年12月公映，即成票房大熱，亦獲國內外影評大讚。今日，《武》片被公認深深影響咗及後佐治魯卡斯拍攝嘅《星球大戰》系列。[87][88][89][90]
黑澤製片 (1959 - 1963)
[編輯]由於黑澤明嘅電影作品規模越見龐大，東宝為咗管理成本風險，建議黑澤明自組製作公司，同時亦畀佢自己可以做聯合出品人，畀佢有更大嘅自由度。於是乎，「黑澤製片公司」就喺1959年4月成立，東宝喺主要股東。[91]
自組公司後嘅首部作品，黑澤明去拍一部批判當時日本政治同商界精英嘅電影《惡漢甜夢》。呢嗰復仇故事講述一名年輕男子滲透入一間日本公司，以揭露導致佢父親死亡嘅真相。電影喺1960年9月公映。開場時一段長達25分鐘嘅婚禮戲，畀人視為黑澤明其中一幕優秀嘅廠景戲。[92][93][94][95]
黑澤製片第二齣作品喺《用心棒》，喺一個圍繞一個19世紀嘅浪人武士椿三十郎，挑撥鎮上敵對勢力嘅故事。黑澤明運用咗唔同類型電影嘅手法（尤其係西部片），影像嘅暴力程度喺當年嘅日本亦係事無前例。《用》亦是黑澤明首次起用演員仲代達矢，而攝影就由宮村一夫同齋藤孝雄負責。電影喺1961年4月公映，無論評價同票房都十分成功，票房打破黑澤之前所有作品嘅紀錄。作品嘅黑色幽默更被廣泛模仿。意式西部片《獨行俠連環奪命槍》(1964)更幾乎是一幕接一幕地翻拍，氣得東宝要告上法庭。[96][97][98]
《用心棒》大獲成功後，東宝向黑澤明施壓拍要添食。結果，黑澤明找回一個喺開拍《用心棒》前已寫成嘅劇本，將劇本修改成為另一個𢰦三十郎嘅故事《穿心劍》亦係佢第一部改篇山本周五郎嘅作品拍成電影。相比《用心棒》，《穿心劍》調子更加輕快，風格更似是時代劇。《穿》喺1962年1月公映，票房很快就超越《用心棒》，並大獲好評。[99][100][101]
與此同時，黑澤明敦促東宝購買美國偵探小說作家艾德．麥克班恩(Ed McBain)第87分局系列小說嘅"King's Ransom"嘅電影版權。黑澤明將佢拍成懸疑片《天國與地獄》，以鞭撻佢心中最差勁嘅罪行——標參。電影喺1963年3月公映，票房再三打破黑澤明作品嘅紀錄兼大獲評價讚賞。諷刺嘅係，電影激發日本一輪綁架浪潮。多年嚟，《天》片畀唔少影評認為喺黑澤明其中一齣最強嘅作品。[102][103][104][105]
赤鬍子 (1964 - 1965)
[編輯]之後，黑澤明花咗足足兩年時間去拍佢下一部作品《赤鬍子》呢齣時代劇。故事源自山本周五郎嘅短篇小說《赤ひげ診療譚》，亦加插杜斯托也夫斯基嘅小說《被侮辱與被損害的》（又叫《豪門孽債》）嘅情節。除咗製作時間長，製作費亦高達二億六千萬日圓。電影講述由加山雄三飾演嘅年輕醫生因緣際會要跟從被稱為赤鬍子嘅資深醫師(三船敏郎飾演)實習，由最初抗拒，到最終折服赤鬍子嘅智仁勇，全片洋溢人文關懷。[106]
電影拍攝時間超過一年（包括五個月嘅前期準備），終於喺1965年春煞科。超長嘅拍攝時期，令台前幕後都筯疲力盡。1965年4月，《赤鬍子》首映，即刻成為當年最高票房，又成為黑澤明第三齣作品獲《電影旬報》選為年度最佳電影。至今，《赤》片仍然係日本觀眾最喜歡嘅黑澤明作品之一。國外嘅反應就不一。[107][108][109][110]
《赤》片亦畀人認為黑澤明電影生涯嘅分水嶺。就連黑澤明本人喺電影公映之時，亦對影評人Donald Richie承認，呢嗰係佢一個循環嘅終結，之後佢嘅拍片方式不得不改變。[111]佢嘅預感成真。皆因自1950年代後期，日本電影觀眾越來越轉投電視作為主要娛樂。當電影公司收益下降，亦代表業界越來越唔願意投資黑澤明過去嗰種成本高昂嘅製作方式。[112]自投身影業29年來（包括做助導嘅五部），黑澤明一共拍咗23齣電影；而喺《赤》片之後嘅28年，佢只能夠拍出7齣電影。另外，《赤》片亦係黑澤明同三船敏郎、藤木悠(曾參演《低下層》、《武士勤王記》)嘅最後一次合作。失去三船敏郎嘅影響十分重大。[113][114]
出國拍片到最後歲月 (1966 - 1998)
[編輯]闖美失敗 (1966 - 1968)
[編輯]1966年尾，黑澤明同東宝嘅專屬合約結束，年屆56歲嘅佢急於求變。有感於當年日本電影工業面臨嘅困境，加上海外排山倒海嘅合作要求，出國拍片嘅諗頭前所未見咁強烈。[115]黑澤明原本打算拍一齣彩色英語片《暴走列車》(Runaway Train)，但係語言隔閡成為一大難題。英文劇本直至1966年秋開鏡之時仍未搞掂。直至1967年秋天，拍攝因為遷就雪景而延期，後來更加在1968年胎死腹中。[116]
呢段時間，黑澤明嘅雄心壯志其實放喺另一齣規模更大嘅電影《虎！虎！虎！偷襲珍珠港》上面。呢齣由二十世紀霍士同黑澤製片聯合出品嘅電影，本來計劃由日本同英語背景嘅導演各自負責日美部份。黑澤明同菊島隆三、小國英雄好幾個月度劇本，但電影項目好快就唔似預期。[117]美國方面導演由大衞連改為執導過《海底六萬里》(1954)、《太平洋生死戰》(1956)、《兇手學生》(1959)、《壯士千秋》(1961)嘅李察．傅利沙(Richard Fleicher)。[118]預算被大減，日本部份被着令唔可以超過90分鐘，對於黑澤明寫咗4個鐘頭嘅故事係好大問題。經過多番修改後，劇本最終係1968年5月敲定。[119]
拍攝喺12月初開始，但黑澤明只係執導咗3個禮拜左右。面對陌生嘅劇組人員同要符合荷理活製作要求，佢陷入困境，而佢嘅工作方式亦無法令荷理活人員理解，甚至被認為佢精神失常。經京都大學專科醫生診斷為神經衰弱，建議佢休假兩個月。[120]1968年聖誕節前夕，美方公布黑澤明因「身心疲累」離開製作組，其實係抄佢魷魚。電影的日本部份亦最終由舛田利雄同深作欣二接手執導。[121]
《虎！虎！虎！偷襲珍珠港》對黑澤明嘅導演生涯喺一大打擊。不單止令佢長年籌劃嘅電影計劃被排除出嚟，就連佢嘅長期拍擋菊島隆三自此離他而去。最大問題係黑澤明嘅精神狀況被質疑，更大鑊嘅係日本電影工業，甚至黑澤明本人，都開始懷疑佢能唔能夠再拍電影。[122][123]
失意自殺 (1969 - 1977)
[編輯]當時，日本電影工業正陷入困境，「映畫之斜陽」人心惶惶。為咗重振影業，木下惠介、市川崑、小林正樹聯同黑澤明組成四騎之會製作公司，計劃四人各自輪流拍一齣電影。[124][125]
佢哋原本打算開拍時代劇《銅鑼平太》做開山之作，但因預算過高而作罷，改為由黑澤明執導，將山本周五郎小說《沒有季節的小墟》改編成電影。黑澤明以九個星期「火速」（以黑澤明嘅標準嚟講）完成拍攝，原本旨在話畀人知佢能夠快速高效完成拍攝。呢齣黑澤明嘅首部彩色片，有別於佢過往嘅剪接風格，以大膽到近乎超現實嘅用色，去映照片中角色嘅艱難嘅生存環境。電影喺1970年10月喺日本公映，票房大敗。四騎之會亦隨之解散。即使如此，電影喺海外有好評，仲獲得提名第44屆奧斯卡金像獎嘅最佳外語片獎。[126]《沒有季節的小墟》之後，黑澤明為電視台拍攝紀錄片《馬之詩》，亦係佢影業生涯唯一一齣紀錄片。[127]
1971年12月22日，黑澤明自殺未遂。之後，佢喺屋企休養，茫茫然不知邊日可以再拍番電影。[128]
1973年初，蘇聯莫斯科電影製片廠接觸黑澤明，問佢可有興趣幫佢哋拍片。黑澤明就提議改編已故俄羅斯探險家弗拉基米爾．阿爾謝尼耶夫自傳式作品《德爾蘇．烏扎拉》，一本講述一個赫哲族獵人面對文明破壞自然嘅故事。黑澤明自1930年代已經想拍呢個故事。1973年12月，63歲嘅黑澤明帶住四個親信進入蘇聯開展電影製作工作。拍攝喺1974年5月起喺西伯利亞拍攝。電影大致喺1975年4月完成，筯疲力盡兼思鄉心切嘅黑澤明喺6月返到日本。1975年8月2號，《德爾蘇烏扎拉》喺日本做全球首映，票房仲幾好。電影先後贏咗第九屆莫斯科國際電影節金獎、奧斯卡金像獎最佳外語片獎等獎項。[129][130]
當年唔少電視節目向黑澤明招手，但係佢只想拍電影。唯一例外喺佢喺1976年幫三得利威士忌拍廣告。即使冇戲開，黑澤明仍忙於寫劇本、劃故事分鏡圖將自己嘅構思留紀錄，為有朝一日可以拍片做準備。[131]
重振聲威 (1978 - 1986)
[編輯]1977年，佐治魯卡斯嘅《星球大戰》上映大獲成功。就好似其他新荷理活嘅名導演一樣，佐治魯卡斯同樣視黑澤明為啟蒙同榜樣，而《星》片受《武士勤王記》影變更是顯而易見。佐治魯卡斯驚訝黑澤明當年苦於無錢開戲，於是喺1978年7月約佢喺三藩市見面，討論黑澤手頭上最具商業潛力嘅電影計劃《影武者》，一個有關一個日本戰國時代盜賊被聘用做武田信玄替身嘅時代劇。佐治魯卡斯對劇本同分鏡草圖着迷，於是運用佢嘅影響力，說服黑澤明嘅老冤家二十世紀霍士出資拍攝，仲搵埋另一黑澤明鐵粉哥普拉做電影嘅聯合監製。[132]
製作喺1979年4月開始，電影由6月拍到1980年3月。即使拍攝途中經歷如易角（男主角由勝新太郎改成仲代達矢），拍攝工作只是延後幾個禮拜，最終係1980年4月喺東京首映。電影即刻成為大熱作品，更加喺海外大收兼大獲好評。同年5月喺法國康城影展一舉奪得金棕櫚獎，但有部份影評批評《影》片中嘅世界觀失去黑澤明過住作品中嘅熱情。當時年屆七十歲嘅黑澤明忙於奔波歐美宣傳《影武者》，並且大搞有關電影嘅展覽。[133][134]
《影武者》嘅成功容許佢開拍下一部時代劇電影《乱》。《乱》嘅故事內容改編自莎士比亞嘅劇作《李爾王》，但時代背景就設定係日本古代。日本片廠都唔想再去沾手呢個成本高昂嘅電影，此時法國製片人（曾經為路易士·布紐爾監製電影）Serge Silberman伸出援手。電影拍攝工作最終喺1983年12月展開，期間遇上黑澤明老婆病重逝世影響，電影最後喺1985年5月31日喺東京國際影展首映，然後喺日本公映。日本票房尚可，而喺海外反應更好。黑澤明亦喺同年秋天外訪歐美，出席各地首映宣傳。[135]
《乱》喺日本贏咗幾個獎項，但就冇黑澤明經典前作咁得到咁高榮譽。當電影被提名競逐第58屆奧斯卡最佳外語片獎時，卻被拒絕，原因係評審搞唔清楚《乱》喺日本電影（負責拍攝），抑或係法國電影（負責出資）。結果黑澤明只憑《乱》獲得最佳導演嘅提名，而最佳服裝設計獎係《乱》喺嗰屆奧斯卡唯一得獎嘅獎項。[136][137]
《影武者》同《乱》（尤其係後者）被公認為黑澤明最好嘅作品之一。《乱》公映後，黑澤明直指呢部係佢嘅最好作品。有別於之前，黑澤明總係話佢下一部電影先會係佢最佳作品。[138][139]
平成耄勤 (1987 - 1998)
[編輯]日本由昭和時代走進平成時代，年近耄耋之年嘅黑澤明雖然孜孜不倦但創作方向亦有所改變，《黑澤明之夢》喺佢從影以來最個人嘅電影，唔單止係劇本由佢自己寫，電影亦幾乎圍繞佢自己嘅夢。即使呢次電影成本較低，仍然無日本電影公司願意投資。黑澤明唯有求助另一個鐵粉史匹堡，去說服華納兄弟買下國際版權。黑澤明嗰仔仲要借錢，先至可以籌足資金開戲。電影喺1990年5月響法國康城影展首映，反應相對平靜。[140]同年，佢獲奧斯卡頒發終身成就獎。[141]
.jpg)
黑澤明之後嘅電影《八月狂想曲》終於自廿年前《沒有季節的小墟》後重返日本製作。由於題材觸及長崎原爆傷痕，電影引起廣乏爭議。拍攝喺1991年初開始，同年5月首映。電影喺美國惹起爭議，被指帶有反美論調，但黑澤明否認。[142][143]
《八》片之後，黑澤明忙住去拍佢下一齣電影《裊裊夕陽情》，一個關於德語教授內田百閒退休後面對戰爭、死亡嘅故事。電影喺1992年2月開鏡，同年9月完成。首映喺1993年4月17號，觀眾嘅反應比黑澤明之前兩齣作品更差。[144]
拍完《裊》片後，黑澤明仍然努力創作，仲寫咗兩個電影劇本。1995年，佢跌倒受傷，要坐輪椅渡過餘生，導演生涯被迫結束。[145]佢原本希望死喺拍片途中[146]，亦肯定無法實現。[147]跌傷意外後，佢嘅健康日漸惡化。人生最後六個月，大部份時間都只能夠躺在床上聽音樂睇電視。平成十年（1998年）9月6日，呢位生於明治年間，成長於大正時期，成名於昭和時代嘅影壇人物，終於因中風而走完一生。[148][149][150]
影視作品
[編輯]雖然黑澤明主要以電影製作人聞名，但佢都有喺舞台劇同電視圈度發展，仲寫過幾本書。詳細嘅一覽，包括佢完整嘅電影作品，可以喺黑澤明嘅作品一覽度搵到。
執導電影
[編輯]- 1943 姿三四郎[151]
- 1944 最美[152]
- 1945 姿三四郎續集[152]
- 1946 我對青春無悔[151]
- 1947 美好的星期天[152]
- 1948 酩酊天使[152]
- 1949 野良犬[152]
- 1949 靜靜的決鬥[151]
- 1950 羅生門[153]
- 1950 醜聞[151]
- 1951 白痴[154]
- 1952 留芳頌[151]
- 1954 七俠四義[151]
- 1955 活人的紀錄[152]
- 1957 低下層[152]
- 1957 蜘蛛巢城[152]
- 1958 武士勤王記[151]
- 1960 惡漢甜夢[151]
- 1961 用心棒[151]
- 1962 穿心劍[152]
- 1963 天國與地獄[151]
- 1965 赤鬍子[151]
- 1970 沒有季節的小墟[152]
- 1975 德爾蘇烏扎拉[152]
- 1980 影武者[155]
- 1985 亂[151]
- 1990 黑澤明之夢[152]
- 1991 八月狂想曲[152]
- 1993 裊裊夕陽情[152]
風格、主題同技巧
[編輯]
黑澤明展示咗一種大膽而充滿活力嘅風格，雖然深受西方電影影響，但又同佢哋唔同；佢參與電影製作嘅所有方面。[156]佢係一個有天賦嘅編劇，由電影開發階段開始就同其他編劇緊密合作，確保劇本質素高，佢認為呢個係一部好電影嘅堅實基礎。佢經常擔任自己電影嘅剪接師。佢嘅團隊，被稱為「黑澤組」，包括攝影師中井朝一、製作助理野上照代同演員志村喬，以忠誠同可靠而聞名。
黑澤明嘅風格以幾種手法同技巧為標誌。喺佢四十年代同五十年代嘅電影中，佢經常使用「軸線剪接」，即係通過一系列配對嘅跳接，而唔係運鏡或溶鏡，令攝影機向主體移動或遠離。[157]另一個風格特徵係「動作剪接」，即係用兩個或以上嘅鏡頭，而唔係一個連續嘅鏡頭，來展示銀幕上嘅動作。[158]同黑澤明緊密相連嘅一種電影標點係「推軸」，呢個效果係通過光學印片機創造出嚟嘅：一條線或一個條形好似喺銀幕上移動，將一個場景嘅結尾抹走，顯露出下一個場景嘅第一個畫面。作為過渡裝置，佢用嚟代替直接剪接或溶鏡；喺佢嘅成熟作品中，推軸成為咗黑澤明嘅標誌。
喺電影配樂方面，黑澤明鍾意用聲音同畫面對比嘅手法，即係音樂或音效好似喺諷刺畫面，而唔係強調畫面。野上照代嘅回憶錄提供咗幾個嚟自《酩酊天使》同《野良犬》嘅例子。黑澤明仲同幾位日本傑出嘅當代作曲家合作過，包括早坂文雄同武滿徹。[159]
黑澤明喺佢嘅電影中使用咗幾個重複出現嘅主題：師徒關係，通常係一個年長嘅導師同一個或多個新人之間嘅關係，呢種關係經常涉及精神上同技術上嘅掌握，以及自我掌控；英雄人物，即係從平凡人中脫穎而出，做啲嘢或糾正啲錯誤嘅特殊個體；用極端天氣作為戲劇手法同人類激情嘅象徵；以及歷史中野蠻暴力循環重複出現。根據Stephen Prince嘅說法，最後一個主題，佢稱之為「黑澤明電影中committed，heroic模式嘅反傳統」，由《蜘蛛巢城》（1957年）開始，喺八十年代嘅電影中重複出現。[161]
獎項同榮譽
[編輯]有兩個電影獎以黑澤明命名。三藩市國際電影節頒發「黑澤明終身成就電影導演獎」，而東京國際電影節則頒發「黑澤明獎」。
黑澤明亦獲得多個國家榮譽，包括1984年被授予法國榮譽軍團勛章、1986年獲意大利共和國功績勛章大十字勳位，仲係1985年第一位獲日本頒發文化勳章嘅電影人。佢逝世後，獲授予從三位，相當於華族制度下嘅貴族頭銜。
紀錄片
[編輯]喺黑澤明事業顛峰期及佢死後，製作咗唔少短片同長片紀錄片關於佢嘅生平同作品。法國影評人克里斯·馬克導演嘅《A.K.》就係喺黑澤明拍攝《亂》嗰時拍攝嘅。不過，呢部紀錄片主要係講黑澤明有禮但比較疏離嘅性格，而唔係講《亂》嘅製作過程。佢死後製作嘅其他紀錄片包括：
- 《黑澤明：最後嘅帝王》（亞歷克斯·考克斯，1999年）
- 《黑澤明嘅信息：為咗美麗嘅電影》（黑澤久雄，2000年）
- 《黑澤明》（亞當·洛，2001年）
- 《黑澤明：創作真係好》（東寶傑作，2002年）
- 《黑澤明：史詩同私密》（2010年）
- 《黑澤明之路》（凱瑟琳·卡杜，2011年）
攷
[編輯]- ↑ San Juan 2018, p. 11
- 1 2 Galbraith, p. 14
- ↑ Kurosawa 1983, p. 17
- ↑ Kurosawa 1983, pp. 5–7
- ↑ Kurosawa 1983, pp. 12–13
- ↑ Galbraith, p. 16
- ↑ Kurosawa 1983, pp. 51–52
- ↑ Prince, p. 302
- ↑ 《蝦蟆的油》第三章第156-161頁
- ↑ 黑澤明監督年譜
- ↑ Kurosawa 1983, pp. 70–71
- 1 2 Galbraith, p. 19
- ↑ 《電影藝術：黑澤明的世界》第22頁(原著為Donald Richie的著作"The Film of Akira Kurosawa")
- ↑ Kurosawa 1983, pp. 72–74, 82
- ↑ Kurosawa 1983, p. 77
- ↑ Kurosawa 1983, p. 84
- ↑ Kurosawa 1983, pp. 89–93
- ↑ Galbraith, p. 25
- ↑ Kurosawa 1983, p. 103
- 1 2 "Akira Kurosawa". A&E Television Networks. April 21, 2016. 喺June 8, 2017搵到.
- ↑ Galbraith, pp. 658–707
- ↑ Galbraith, p. 39
- ↑ Kurosawa 1983, pp. 121–123
- ↑ Galbraith, pp. 43, 45–46
- ↑ Kurosawa 1983, pp. 124–128, 130–131
- ↑ Kurosawa 1983, pp. 132–135
- ↑ Galbraith, pp. 46–51
- ↑ Kurosawa 1983, pp. 137–139
- ↑ Galbraith, pp. 55–57
- ↑ Galbraith, pp. 64, 191
- ↑ Kurosawa 1983, pp. 135–137
- ↑ Galbraith, pp. 51–55
- ↑ Richie 1999, pp. 24–25
- ↑ Galbraith, pp. 660–661
- ↑ Richie 2001, p. 106
- ↑ Galbraith, pp. 65–67
- ↑ Galbraith, pp. 70–79; Richie 1999, p. 37; Kurosawa 1983, p. 150; Yoshimoto, pp. 114–134
- ↑ Richie 1999, pp. 43–46; Galbraith, pp. 87–91
- ↑ Crow, Jonathan (January 9, 2015). "Akira Kurosawa's Top 100 Films". Open Culture. 喺August 8, 2017搵到.
- ↑ Kurosawa 1983, pp. 159–161
- ↑ Morris, Gary (October 1, 2000). "Three Early Kurosawas: Drunken Angel, Scandal, I Live in Fear". Bright Lights Film Journal. 喺June 8, 2017搵到.
- ↑ Warren, Richard (February 2, 2015). "Brando and Eliot in shadows". Richard Warren Review. 喺August 8, 2017搵到.
- ↑ Kurosawa 1983, pp. 161–164
- ↑ Bock 1978, p. 169
- ↑ Galbraith, pp. 94–97
- ↑ Richie 1999, pp. 47–53
- ↑ Hirano, Kyoko (1992). Mr. Smith Goes to Tokyo: Japanese Cinema Under the American Occupation, 1945–1952. Washington and London: Smithsonian Institution Press. pp. 225–226. ISBN 1560981571.
- ↑ Kurosawa 1983, pp. 166–168
- ↑ Kurosawa 1983, pp. 168–169
- ↑ Richie 1999, pp. 54–57
- ↑ Galbraith, pp. 100–104
- ↑ Yoshimoto, pp. 140–146
- ↑ Broe, Dennis (2014). Class, Crime and International Film Noir: Globalizing America's Dark Art. London: Palgrave Macmillan. pp. 162–167. ISBN 978-1-137-29013-7. 喺June 9, 2017搵到.
- ↑ Kurosawa 1983, pp. 172–177
- ↑ Galbraith, pp. 108–115
- ↑ Richie 1999, pp. 58–64
- ↑ Kurosawa 1983, pp. 177–180; Richie 1999, pp. 65–69; Galbraith, pp. 118–126; Yoshimoto, pp. 180–181
- ↑ Galbraith, pp. 127–138
- ↑ Kurosawa 1983, pp. 180–187
- ↑ Nogami, pp. 82–99
- ↑ Galbraith, p. 132
- ↑ Galbraith, p. 136
- ↑ Galbraith 2002, pp. 137–140
- ↑ Galbraith, pp. 144–147
- ↑ Prince, pp. 135–142
- ↑ Yoshimoto, pp. 190–193
- ↑ Richie 1999, pp. 81–85
- ↑ Simone, R. Thomas (1975). "The Mythos of "The Sickness Unto Death" Kurosawa's "Ikiru" and Tolstoy's "The Death of Ivan Ilyich"". Literature/Film Quarterly. 3 (1): 2–12. JSTOR 43795380. 喺April 27, 2024搵到.
- ↑ Galbraith, pp. 155–167
- ↑ Richie 1999, pp. 86–96
- ↑ Prince, pp. 99–113
- 1 2 Galbraith, pp. 170–171
- ↑ Mellen 2002, p. 6
- ↑ Richie 1999, pp. 97–108
- ↑ "Seven Samurai (1954)". BFI Film Forever. British Film Institute. 原著喺December 18, 2023歸檔. 喺December 18, 2023搵到.
- ↑ Galbraith, pp. 214–223
- ↑ Goodwin 1994, p. 125
- ↑ Prince, pp. 159–170
- ↑ Galbraith, pp. 230–239
- ↑ Richie 1999, pp. 115–124
- ↑ Kurosawa (WNET), bonus materials: Isuzu Yamada interview
- ↑ Prince, pp. 142–149
- ↑ Galbraith, pp. 239–246
- ↑ Prince, pp. 149–154
- ↑ Bock 1978, pp. 171, 185–186
- ↑ Richie 1999, pp. 125–133
- ↑ Galbraith, pp. 253–264
- ↑ Richie 1999, pp. 134–139
- ↑ Star Wars, George Lucas com1mentary
- ↑ Conrad 2022, pp. 123–128
- ↑ Galbraith, p. 264
- ↑ Richie 1999, pp. 140–146
- ↑ Yoshimoto, p. 274
- ↑ Galbraith, pp. 286–293
- ↑ Prince, pp. 175–188
- ↑ Galbraith, pp. 301–313
- ↑ Yoshimoto, pp. 289–292
- ↑ Richie 1999, pp. 147–155
- ↑ Galbraith, pp. 324–329
- ↑ Yoshimoto, pp. 293–296
- ↑ Richie 1999, pp. 156–162
- ↑ Galbraith, pp. 341–361
- ↑ Richie 1999, pp. 163–170
- ↑ Prince, pp. 188–189
- ↑ Mellen 2002, p. 28
- ↑ Galbraith, pp. 372–374
- ↑ Galbraith, pp. 374–389
- ↑ Richie 1999, pp. 171–183
- ↑ Yoshimoto, pp. 332–333
- ↑ Prince, pp. 235–249
- ↑ Richie 1999, p. 183
- ↑ Prince, pp. 4–5
- ↑ Galbraith, p. 242
- ↑ Kurosawa (WNET), Donald Richie interview
- ↑ Galbraith, pp. 440–441
- ↑ Galbraith, pp. 440–448
- ↑ Galbraith, pp. 448–449, 451–456
- ↑ Galbraith, p. 450
- ↑ Galbraith, pp. 452–453
- ↑ Hiroshi Tasogawa. All the Emperor's Men, Hardcover: 337 pp Publisher: Applause; 1 edition (2012). ISBN 1-55783-850-X. p. 255.
- ↑ Galbraith, pp. 448–468
- ↑ Kurosawa: The Last Emperor, Donald Richie interview
- ↑ Galbraith, pp. 458–471
- ↑ Galbraith, pp. 437–474
- ↑ Yojimbo, DVD featurette: It Is Wonderful to Create – Crew Interview
- ↑ Galbraith, pp. 474–486
- ↑ "Song of the Horse". Akirakurosawa.info. 喺December 13, 2020搵到.
- ↑ Galbraith, pp. 487–489, 522
- ↑ Nogami, pp. 127–155
- ↑ Galbraith, pp. 518–522
- ↑ Galbraith, pp. 513–514, 522–523, 544–546
- ↑ Galbraith, p. 547
- ↑ Galbraith, pp. 547–558
- ↑ Richie 1999, pp. 204–213
- ↑ Galbraith, pp. 576–583
- ↑ "Ran (1985) – Awards". AllMovie. 喺June 9, 2017搵到.
- ↑ Galbraith, pp. 582–586
- ↑ Galbraith, pp. 580–586
- ↑ Richie1999, p. 214
- ↑ Galbraith, pp. 604–608
- ↑ "Search Results". Academy Award Acceptance Speech Database. Academy of Motion Picture Arts and Sciences. 原著喺February 17, 2010歸檔. 喺June 12, 2017搵到.
- ↑ Galbraith, pp. 612–618
- ↑ Galbraith, p. 619
- ↑ Galbraith, pp. 622–627
- ↑ Galbraith, pp. 636–639
- ↑ Kurosawa 1983, p. viii
- ↑ Prince, p. 339
- ↑ Adair, Gilbert (September 7, 1998). "Obituary: Akira Kurosawa". The Independent. 原先內容歸檔喺August 21, 2019. 喺August 21, 2019搵到.
- ↑ Galbraith, pp. 639–640
- ↑ Lyman, Rick (September 7, 1998). "Akira Kurosawa, Film Director, Is Dead at 88". The New York Times.
- 1 2 3 4 5 6 7 8 9 10 11 12 世界電影經典回顧2017 展現黑澤明電影的仁與義
- 1 2 3 4 5 6 7 8 9 10 11 12 13 14 PlayItAgain網站 黑澤明作品香港中文譯名
- ↑ HKIFF Cine Fan 香港電影節發燒友 —— 羅生門
- ↑ HKIFF Cine Fan 香港電影節發燒友 —— 白痴
- ↑ HKIFF Cine Fan 電影節發燒友 —— 影武者
- ↑ 黑澤明 2008, 第131頁，轉載自John Powers嘅訪問，《L.A. Weekly》，1986年4月4日，第45–47頁
- ↑ 〈電影藝術觀察：黑澤明嘅早春〉 (博客)。2009年12月8日。喺2017年6月12日搵到。
- ↑ 七武士, DVD bonus featurette：《七武士：起源同影響》，Joan Mellen評論
- ↑ 野上，頁 183–209
- ↑ 〈關於丸內劍片喰（片喰紋）嘅解說〉。《季節嘅小道消息》。2017年5月6日。
- ↑ Prince, p. 149
註
[編輯]出面網頁
[編輯]
- 黑澤明喺互聯網電影資料庫嘅資料（英文）
- PlayItAgain網站 黑澤明作品香港中文譯名