黨媒姓黨
黨媒姓黨[1]，即係「黨同政府主辦嘅媒體必須姓黨」[2]，由中共中央總書記習近平喺2016年2月19號喺北京主持召開「黨嘅新聞輿論工作座談會」嗰陣提出嘅政治指導原則。
背景
[編輯]2010年7月，中共中央政治局常委、中央書記處書記習近平喺「全國黨史工作會議」提出「黨史姓黨」[3]。2015年12月，習近平喺全國黨校會議提出「黨校姓黨」、視察《解放軍報》嗰陣提出「軍報姓黨」[4]。
2016年1月，中共中央總書記習近平主持中共中央政治局常委會嗰陣，將毛澤東時代嘅黨領導一切重新作為一項政治原則。2月19號上晝，習近平對人民日報社、新華社、中國中央電視台進行調研，中央電視台打出「央視姓黨，絕對忠誠，請您檢閱」嘅標語歡迎佢[5]。下晝，習近平喺人民大會堂主持召開「黨嘅新聞輿論工作座談會」，會上佢強調話：[1]
必須將政治方向擺喺第一位，牢牢堅持黨性原則，牢牢堅持馬克思主義新聞觀，牢牢堅持正確輿論導向，牢牢堅持正面宣傳為主。
黨嘅新聞輿論工作堅持黨性原則，最根本嘅係堅持黨對新聞輿論工作嘅領導。黨同政府主辦嘅媒體係黨同政府嘅宣傳陣地，必須姓黨。黨嘅新聞輿論媒體嘅所有工作，都要體現黨嘅意志、反映黨嘅主張，維護黨中央權威、維護黨嘅團結，做到愛黨、護黨、為黨；都要增強睇齊意識，喺思想上、政治上、行動上同黨中央保持高度一致；都要堅持黨性同人民性相統一，將黨嘅理論同路線方針政策變成人民群眾嘅自覺行動，及時將人民群眾創造嘅經驗同面臨嘅實際情況反映出嚟，豐富人民精神世界，增強人民精神力量。
新聞輿論工作，各個方面、各個環節都要堅持正確輿論導向。各級黨報、黨刊、電台、電視台要講導向，都市類報刊、新媒體亦要講導向；新聞報道要講導向，副刊、專題節目、廣告宣傳亦要講導向；時政新聞要講導向，娛樂類、社會類新聞亦要講導向；國內新聞報道要講導向，國際新聞報道亦要講導向。
評論
[編輯]- 中國大陸各地，涵蓋30個省、自治區、直轄市嘅報業集團都對習近平觀點積極響應[6]。
- 國防大學戰略研究所教授戴旭認為堅持「黨媒姓黨」，先能以「正確嘅輿論鼓舞人心、凝聚士氣，鞏固黨同國家政治安全嘅陣地」，防止「顏色革命」嘅發生。佢同時表示喺增強軍事硬實力嘅同時亦要增強「中國意識形態嘅安全」[7]。
- 北京歷史學者章立凡接受香港《明報》嘅採訪嗰陣指出，習近平做出呢一個舉動係中共輿論控制嚴重失控嘅表現。今次行程係爲咗加強對媒體嘅控制，習近平將會直接控制輿論宣傳，未來可能有更大動作。而「姓」字反映出毛澤東時代嘅思維同「紅二代」嘅思維。[3]
- 臺灣開南大學公共事務管理學系副教授張執中話，習近平嘅「黨性教育」已經從組織外延至各個部門，中共中央逐步確立「黨性」嘅指標，又將習嘅「政治規矩」加以制度化。從「黨性」到「姓黨」，係習近平純化黨員嘅要求。[4]
- 知名媒體評論人王銘義分析，紅色企業家任志強因為喺微博質疑習近平嘅做法受到批判浪潮，「係文革式嘅」，習近平執政之後中共對意識型態同輿論陣地嘅掌控正持續增強，「圍剿任志強」事件係必然出現嘅操作形式。[8]
參考
[編輯]- ↑ 1.0 1.1 李斌、霍小光 (2016-02-19)。〈習近平：黨同政府主辦嘅媒體必須姓黨〉。《鳳凰網》。新華通訊社。原先內容歸檔喺2016-04-25。喺2016-04-18搵到。
- ↑ 〈"黨媒姓黨"係根本方向〉。《光明新聞》。2016-04-06。原先內容歸檔喺2016-04-17。喺2016-04-18搵到。
- ↑ 3.0 3.1 明報，2016年2月20號，A12版
- ↑ 4.0 4.1 張執中 (2016-03-04)。〈官媒姓黨 台灣觀點》彰顯習近平一致性要求〉。《中時電子報》。原先內容歸檔喺2016-05-13。喺2016-04-18搵到。
- ↑ 〈習近平訪官媒 央視打出「央視姓黨，絕對忠誠」〉。自由時報。2016-02-20。原先內容歸檔喺2016-07-14。喺2016-10-16搵到。
- ↑ 邊驛卒 (2016-02-24)。〈不給錯誤言論提供傳播渠道——各地媒體表態：黨媒姓黨〉。鳳凰網。北京日報、山西日報、河南日報、河北日報、西部網、甘肅日報、紅網、大眾日報等。原先內容歸檔喺2017-09-03。喺2017-09-03搵到。
- ↑ 戴旭 (2016-04-29)。〈戴旭論黨媒"姓黨"〉。中國軍網。原先內容歸檔喺2017-09-03。喺2017-09-03搵到。
- ↑ 王銘義專欄－媒體姓黨嘅深層隱憂 互聯網檔案館嘅歸檔，歸檔日期2016年5月13號，. 中時電子報