1997年3月9號日食

呢次日食嘅地圖

1997年3月9號星期日發生咗一次日全食。當月球嘅表觀直徑大過太陽嘅直徑嗰陣，就會發生日全食，擋哂所有嘅直射陽光，將日頭變成夜晚。日全食發生喺地球表面嘅一條狹窄路徑上，日偏食喺周圍幾千公里闊嘅地區都可以見到。俄羅斯東部、蒙古國北部、新疆北端、中國東北同埋哈薩克東端都可以見到日全食。

概要

今次日食主要喺東亞同埋阿拉斯加州出現。由蒙古國延伸到東西伯利亞（阿爾泰、布里亞特、赤塔州同埋薩哈）嘅狹長地帶上可以見到日全食。日全食嘅最長持續時間係2分50秒。今次日全食只係喺寒冷而且人煙稀少嘅地區可以見到，日全食帶內最大嘅城市係俄羅斯嘅赤塔，當時有38萬人口。俄羅斯嘅伊爾庫茨克同埋蒙古國嘅烏蘭巴托等地都位於全食帶之外，睇唔到日全食。

然而，由於佢發生喺冬季嘅東北亞大陸中部，當地預計晴天嘅機率好高，而且由於日食發生喺星期日，打工仔唔需要攞假嚟睇佢。咁啱得咁橋，當時出現嘅海爾-博普彗星有可能喺日全食期間用肉眼睇到，因此日本發起好多場日食之旅。

此外，全食帶地區嘅氣溫預計將低至攝氏零下20至30度，攝影設備需要具有耐寒嘅作用。今次日食亦都係十分獨特，令好多人使用唔需要電池嘅機械相機。

觀測

俄羅斯赤塔嘅日全食

俄羅斯

位於西伯利亞東南部嘅俄羅斯城市赤塔，來自日本嘅大約50個觀察員喺日出前冒著攝氏零下20度嘅寒冷天氣下，身處喺距離市中心大約7公里嘅市郊丘陵地帶，將相機同埋其他設備一字排開（為咗設立赤道儀）。

日出時天空比較多雲，但喺日食開始前嘅8點30分（當地時間，雅庫茨克時間）左右終於放晴。當日食開始時，附近嘅居民同小朋友都將膠卷舉到眼前，抬頭望上天空。

隨著全食嘅臨近，溫度迅速下跌，溫度計嘅刻度跌到攝氏零下22度。

就到10點嘅時候，昏暗嘅天空出現咗一個帶著波動日冕嘅黑色太陽。水星同金星都可以喺離太陽好近喺距離觀察到。我哋尋找預期中的海爾-波普彗星，但佢比雲層遮住咗，睇唔到。

當日全食完咗，鑽石環展示嘅嗰一刻，煙火齊鳴，全場掌聲雷動。

蒙古國

好多人趕過去蒙古國睇日食，但由於雲層原因，睇唔到日全食。

中國

喺中國，日食帶經過西北同東北兩個地區。兩者都位於邊境沿線，距離大城市相當遠。西北係新疆北部阿勒泰地區，東北係內蒙古呼倫貝爾盟北部（今日嘅呼倫貝爾市）同黑龍江省大興安嶺地區北部嘅鄰近地區。其餘大部分地區只可以睇到日偏食，而唔係日全食。 因此，中國日全食嘅觀測主要集中在西北同東北嘅邊境地區。

中國最北端嘅地方，黑龍江省漠河縣（今日嘅漠河市）喺日全食時嘅仰角同俯角都比較高，而且日全食嘅持續時間比較長，係中國最清晰可見日食嘅地方。佢成為一個觀測日食嘅聚集地。其中，位於漠河城北端、同俄羅斯接壤嘅漠河鄉（今日嘅北極鎮）嘅持續時間最長。好多民眾前嚟觀賞日全食同海爾-博普彗星。另外，中國第一次日全食業餘無線電通訊實驗同日全食電視直播（中央電視台）喺漠河舉行。

出面網頁

• NASA有關今次日食嘅報告
• Google1997日食互動地圖