2020-2021年中國大陸停電限電爭議

2020-2021年中國大陸停電限電爭議，係指喺2020年12月底開始，中國大陸多個地區推行限電措施或者爆發大規模停電，市民生活大受影響，連暖氣供應都成問題。對於事件原因，唔同地方嘅政府都有唔同嘅說法，但亦有一啲政府部門否認停電。

起因

有分析認為，停電跡象可能同中國澳洲嘅貿易戰有關。中國主要火力發電為主，澳洲進口煤炭就約佔咗中國用煤總量1.9%。但2020年11月中嗰陣，北京為咗報復澳洲喺國際社會聲援香港、新疆同台灣，對澳洲採取各種入口措施，其中就包括咗發電用嘅煤炭。不過，亦有中國內地學者話，無預警停電係同地方政府年底減排指標有關。亦有人提出其他政治因素，例如台灣資深媒體人黃創夏就話，中國可能發生緊一場「電力政變」。

各區情況

喺2020年12月21號，湖南、江西、浙江等省份陸續發布有限用電或者限電通知，衝擊唔少民眾嘅生活，其中湖南電力甚至進入咗「戰時狀態」。情況一直延續去到2021年，而且包括唔同省份。

廣東省

喺2020年12月21日凌晨，廣州白雲、越秀、荔灣等多個地區東莞、深圳、中山、佛山、惠州、珠海等，爆發大規模停電，好多網民接連上網分享災情慘況，生活幾乎停擺，疑似去到下午兩點，仍有一啲網民話冇電用。有網民批評，無法接受呢種無預警嘅停電，無疑為生活造成極大麻煩。廣州供電局否認事件，強調21號凌晨兩點就立即派人前往三元里、羅沖圍搶修，1個鐘左右就恢復全部供電。但係好多網民都唔接受供電局解釋，又形容官方喺度遮遮掩掩太丟架。

北京

2020年12月21號至25號，北京豐台區、西城區、東城區、昌平區等部分街道社區都相繼停電。陸媒「今日頭條」報導咗部分停電通知，但之後呢啲報導都被刪除。另外，北京市內唔同地區停電時間唔同，疑似為「輪流停電」嘅狀況。

去到2021年1月6號，北京遭逢寒流來襲，海淀區嘅氣溫下降去到零下17°C。有好多中國網民話，北京6日一早就停電，能見度去到零，除咗氣溫驟降，屋企仲停水停電停暖。

上海

2020年12月22號早上，上海市多個地段都開始停電近12個鐘，包括唐家灣路、新河馬路，新河鎮等路段。上海市電力公司回應嘅時候話，只係進行計劃內嘅安全檢修，屬於日常嘅電網維修工作。

2021年1月7號，上海有唔少地區喺無預警嘅情況下突然停電，好多人話自己屋企電閘反覆「跳掣」，而且街燈失靈，全市發生超過 4,500 單故障，不過上海電力部門就話係因為當地用電負荷創咗新高。

山東省

喺2021年1月6號，山東師範大學夜晚全校停電，學生要喺黑暗入面上堂，結果引起唔少學生喺網上抱怨。

湖南省

湖南省政府下令，每日指定時間，大部分建築物外面同埋廣告大屏嘅照明都要關閉，辦公大樓週末唔供電。居民唔可以用電爐或者焗爐。另外，因應限電措施，電梯停開，有工人因而要爬幾十層樓梯。

浙江省

喺義烏，政府曾經試過幾日唔開路燈，直到居民投訴安全問題。另外，有啲工廠被要求間歇性停工以控制用電量，由於好多工廠要應付年底要出貨嘅訂單，佢哋都搶購或者租用柴油發電機。

喺溫州，政府要求一啲公司，除非氣溫下降到接近零度，否則唔好喺辦公室開暖氣。

外間回應

中國異見人士

• 民主中國陣線主席秦晉認為，事件代表中國有深層次嘅經濟危機，又話中國對澳洲實施煤炭禁運，令中國唔夠煤炭用作發電，結果喺電力問題上出現好大樽頸 。
• 中國民主黨全國委員會主席王軍濤話，事件可能係中國經濟或者同其他國家關係嘅問題影響煤炭供應，亦可能係中共要準備因應有可能出現嘅重大突發事件。

其他地方人士

• 台灣《自由時報》嘅報道形容，係中國政府制裁澳洲澳煤，結果自嘗苦果。
• 澳洲《天空新聞》主播史密斯（Chris Smith）喺節目入面直指中國做法搞笑，令超過10億人受凍，就係為咗對澳洲嘅「幼稚抗議」。佢又提到，浙江有5700萬居民喺呢個寒冬來臨之際，除非溫度降到3℃以下，否則唔可以用暖氣，質疑呢啲係對自己人嘅折磨；喺湖南因為電梯停擺，6700萬居民被迫要爬20層樓先返到自己屋企，無電梯畀老人家用，呢度都係中國自己攞嚟。

北京當局回應

中國外交部發言人華春瑩喺2021年1月6號就事件回應，話中國電力供應能力「是有保障的」，只係外面嘅人唔清楚。