蠶豆症

蠶豆症，學名「六磷酸葡萄醣去氫酵素缺乏症」（簡稱「G6PD缺乏症」，英文：glucose-6-phosphate dehydrogenase deficiency），係一種遺傳性酵素缺失類貧血。

呢種病有「蠶豆症」呢個俗名，係因為患者食蠶豆嘅話會造成急性溶血反應，輕則出黃疸，重則有生命危險。

全世界大約有四億人有蠶豆症，主要喺非洲、亞洲、中東、地中海，呢個地域分佈同蠶豆症患者冇咁易俾瘧疾感染有關。由於蠶豆症係一種X染色體基因缺失病，所以男性患者多過女性。