Games Animation Forum

Games Animation Forum，簡單啲叫做GAF，係一個主要由香港人整出嚟用嘅網絡論壇。呢個網站嘅內容主要係有關日本動畫、日本漫畫同埋電子遊戲嘅。隨住時日愈嚟愈耐，呢個網站加入咗好多好似清談、學術、娛樂、體育同埋飲食咁嘅討論主題。

特色

• GAF好似其他網絡論壇咁，畀啲已經登記咗嘅會員喺論壇裡面講嘢，不過GAF嘅管理比較嚴，好似會即時封鎖一啲挑釁或者講粗口嘅會員。通常都只會封鎖嗰啲會員一陣，好似3日或者7日咁，不過比較犀利啲嘅先會封鎖一世。

• GAF唔畀討論翻版嘅電子遊戲同埋「金手指」。而「金手指」即係一啲唔係用正常手段嚟喺電子遊戲裡面嬴嘅嘢。

• 喺啲討論主題裡面，唔可以同時開幾個講緊同一樣嘢嘅主題，因為呢個論壇要求啲會員事先喺舊主題裡面講嘢，令到個頁面比較好睇。

• 呢個論壇有唔少女性會員，令到論壇裡面嘅男女比例較平均。年齡方面，個論壇偏向吸引成年人，所以就冇乜小學生同埋初中生。

• GAF嘅部分會員曾經做過啲電玩雜誌嘅編輯，或者有好多玩電子遊戲嘅經驗，所以GAF喺香港嘅遊戲論壇之中都有極高嘅地位。

• 喺日本動漫畫討論版、電視遊戲討論版、街機遊戲討論版、PC電腦遊戲討論版同埋手提遊戲機討論版裡面，啲版主日日都由日本、台灣、歐洲、美國呢啲地方嘅大型電子遊戲網站度轉貼各種遊戲嘅新料，令到GAF對電子遊戲嘅資訊同埋香港海外嘅電子遊戲廠商同步。

• 部分喺呢個論壇度活躍嘅會員會喺好多同動漫有關嘅活動之中現身，例如喺一個同人活動「超級機械人大戰魂」演唱會裡面出現。

歷史

GAF嘅由來同「Game Players Forum」有好大關係。Game Players Forum，可以叫做GPF，係個已經休咗刊嘅香港電子遊戲雜誌《Gameplayers》嘅網站「Gameplayers.com」嘅網絡論壇。 Gameplayers.com個伺服器關站嗰時，有個喺GPF度好活躍嘅會員整咗個新嘅論壇「DVDForum」，吸引咗好多本來喺GPF度玩嘅會員。之後DVDForum嘅管理人嘈交，咁就由另一個叫做「Yui Narusawa」嘅會員喺2000年整咗個GAF出嚟。

GAF成立之後冇幾耐，立即有勁多會員加入。直到2005年，呢個論壇嘅人流先至愈嚟愈少。GAF喺2006年9月嗰陣換咗個伺服器，但係因為同新嘅網絡服務公司有啲溝通上嘅問題，嗰間公司唔可以提供足夠嘅頻寬，所以呢個論壇就用咗另一間網絡服務公司。新嘅伺服器喺9月10日搞掂，令到GAF可以再開番。

重要事件

GAF年年都有好多事件發生，下面都係啲同外界有關係嘅重要嘢。

2004年

• 喺2004年年尾，GAF部份版主同埋會員接受咗香港電台電視節目嘅訪問，內容係講電力對於多媒體同埋電子遊戲發展嘅影響。

2005年

• 2005年，香港有本叫做《G-ZONE》嘅電子遊戲雜誌創刊，有會員為佢增設咗個討論區，之後變咗做討論每一期喺香港賣嘅電子遊戲雜誌嘅質素，引嚟香港電子遊戲雜誌界嘅留意。

• 有本原創漫畫《神龍刺青》喺GAF裡面登咗出嚟之後勁受歡迎，之後令到嗰個故事喺論壇以外嘅知名度大增。《神龍刺青》後嚟喺論壇之外嘅地方都好出名，個故事嘅單行本創咗一粒鐘之內賣晒嘅紀錄，同埋畀人拍咗做電影。

2006年

• 2006年6月，之前講嗰本雜誌《G-ZONE》偷咗日本漫畫《涼宮春日的憂鬱》喺GAF度嘅同人插圖。呢件事發生喺6月1日出版嘅第16期《G-ZONE》第66頁「動漫遊」嘅右上方。嗰間出版社未經畫呢幅畫嗰位GAF會員同意，而就咁用咗嗰幅圖。之後就畀嗰個會員發現呢件事，重發覺嗰本雜誌上面冇印到電話號碼同埋個地址係錯嘅，後嚟經GAF嘅會員查出嗰位編輯嘅電話號碼。

各個討論區

GAF有好多個主題嘅討論區，部分嘅討論區裡面有一啲子討論區。

外部鏈接

• Games Animation Forum