HKG報
《HKG報》係香港一個親中派嘅媒體，喺2015年由親中派政治組織「幫港出聲」召集人周融所創辦[1][2]，而家由同屬激進親中派嘅周天慧擔任行政總裁[3]。據周融解釋，「HKG」係香港嘅簡寫，可解作「Hong Kong Good」或者「Hong Kong Great」，亦可以譯做「香港好」或者「香港偉大」[4]。
事件同爭議
[編輯]HKG報嘅立場係親中派，佢哋自創立以來，報道都受到爭議同批評。喺2021年，有唔同學術期刊分別發表文章，話HKG報雖然自稱係新聞平台，但實際係散播政治宣傳嘅平台，可信度備受質疑，而且被中文維基百科列作唔可靠嘅資料來源[5][6]。
疑消費家庭悲劇死者同抹黑政治異見者
[編輯]2018年6月，香港屯門發生個女殺死父母再自殺嘅命案，《HKG報》隨後以「疑佔中後輟學走向極端 弒父母女生是黃絲殺手」為標題發表文章，文中引述標題為《屯門弑父母女生證是黃絲帶支持非法佔中者》嘅匿名而未經考證嘅網絡帖文，指涉案女子係「黃絲帶支持非法佔中者」，喺讓愛與和平佔領中環事件失敗後思想同行為走向極端，從而走上歧路[7]。
該文章被批評係消費死者同捕風捉影嘅政治攻擊，有學者指出對事件作出猜側或探究成因無益處，亦有精神科專科醫生就事件表示網上一啲言論帶批判性兼且內容失實，呢啲負面討論可能導致死者家屬產生抑鬱情況，造成「另一重傷害」[7][8]。
俾人話拍假片
[編輯]2019年6月香港《逃犯條例修訂草案》風波嗰陣，《HKG報》播出一段標題叫《香港學校內在發生什麼？請聽這位英華女生的勇敢控訴！》嘅片，條片入面一個自稱係英華女學校嘅女學生接受《HKG報》訪問，佢聲稱學校嘅立場一直支持「反對派」（建制派針對民主派嘅用語），又話學校裏面比較支持建制派言論嘅學生會俾同學鬧，而通識科「大部分」時間會講中國嘅負面消息，同埋會有學校校董會洗學生腦等。條片出街後即刻喺親建制派嘅平台上面廣傳，係繼俾人話係造假嘅《致年青人：你們沒上街的父母根本沒有愛過你》同埋「深宵酒樓家庭鬧劇」影片出街後，建制派又一次喺《逃犯條例修訂草案》風波期間發出嚟嘅引導輿論嘅宣傳片。有評論分析仲話，呢段片喺客觀宣傳效果上，畀咗觀眾一個印象，指而家後生仔嘅抗爭意識，係嚟自老師向佢哋灌輸對建制同埋共產黨嘅批評。
英華女學校之後喺學校官方網頁回應，強調校方嘅立場一向中立，老師用持平嘅態度，引導學生多角度思考，仲鼓勵佢哋坦誠咁溝通，以建立互信、包容同埋尊重嘅文化，又話講座嘉賓係以專業嘅角度去分享見解，而校方只係提供平台同埋空間，畀同學反思同自由咁表達意見[9]，並表示原定嘅升旗儀式會延至7月4號舉行[10]。
香港市場營銷專家、作家徐緣話，從客觀宣傳效果嚟講，段片令人產生「當今年輕人的抗爭意識源於老師向學生灌輸對建制及共產黨的批評」呢個印象。佢仲假設建制派要令學校籠罩喺白色恐怖裏面，就搵個唔講名同遮咗樣嘅人嚟拍片篤灰，之後再讚佢係「正義敢言嘅後生仔」，呢個舉動足以令校方有麻煩，因為咁而要同家長交代番，同埋仲要面對傳媒嘅查詢，其他學校可能因為咁而有樣學樣，會加強自我審查[11]。
徐緣仲話，類似嘅手段喺德國都出現過。2018年，俾人話係將納粹精神復闢嘅德國最大極右派政黨德國另類選擇推出咗爭議好大嘅「舉報老師」政策。呢個黨開咗個叫「獵師」（Lehrer-Pranger）嘅篤灰網站，鼓勵學生同家長上網對喺課堂裏面公開批評另類選擇黨嘅老師進行篤灰，將老師「政治唔中立」嘅證據上傳。個黨搵嗮證據後，就向有關當局投訴追究，以懲處相關老師。另類選擇黨呢個政策引嚟好多國民嘅不滿，當中德國司法部長卡特琳娜·巴爾利仲話政策係「獨裁者嘅惡行，企圖限制民主自由」，仲話「任何鼓勵學生監視老師嘅人，都係將史塔西（東德時代嘅秘密警察）嘅作為帶返德國。」另類選擇黨反駁，指部分老師違反咗1976年訂定嘅「博特斯巴赫共識」裏面嘅教師中立原則，然而博特斯巴赫共識係針對納粹黨而設，以避佢哋再次透過學校對人政治洗腦，步德國人受極權政府統治嘅覆轍。徐緣又話：「學校政治中立嘅精神，某程度係為咗防範極權政府嘅魔爪，亦防止學校捲入政治漩渦。但當政治失衡，政權腐敗，政客無恥，政治口號宣傳以至政策惡法都夾硬推動，觸及社會人倫道德底線，老師係咪都要刻意中立而唔帶立場呢？」[11]。
Facebook 專頁被封鎖
[編輯]2020年1月農曆新年期間，HKG報嘅Facebook專頁因為被檢舉問題而封鎖，之後佢哋就建立咗「HKG報2.0」專頁[12]。
睇埋
[編輯]- 被視為受到中華人民共和國政府影響嘅非本地媒體一覽
- 點新聞：另一個被指不時發放有利親中派假新聞嘅媒體
參考
[編輯]- ↑ 〈馮煒光批「天下為公」眾籌 交何俊仁作律師費 林卓廷：從無隱瞞何俊仁角色〉。立場新聞。2018-04-25。原著喺2018-06-19歸檔。喺2018-07-15搵到。
- ↑ 〈煒光獲准賣保險開公關公司 《HKG報》撰稿齋評中國發展〉。香港01。2017-09-01。原著喺2018-07-07歸檔。喺2018-07-15搵到。
- ↑ 〈HKG報〉。hkgpao.com。喺2021-09-24搵到。
- ↑ 〈周融稱自資數十萬搞網媒「HKG」 可譯「香港偉大」〉。明報。2015-04-29。原著喺2019-02-12歸檔。喺2019-02-11搵到。
- ↑ Au, Cheuk Hang; Ho, Kevin K. W.; Chiu, Dickson K.W. (2021-04-19). "The Role of Online Misinformation and Fake News in Ideological Polarization: Barriers, Catalysts, and Implications". Information Systems Frontiers (英文). doi:10.1007/s10796-021-10133-9. ISSN 1572-9419.
- ↑ "Does political extremity harm the ability to identify online information validity? Testing the impact of polarisation through online experiments". Government Information Quarterly (英文): 101602. 2021-07-10. doi:10.1016/j.giq.2021.101602. ISSN 0740-624X.
- ↑ 7.0 7.1 〈【三屍命案】《HKG報》稱女事主疑佔中後變極端 羅冠聰：消費死者、捕風捉影〉。立場新聞。2018-06-21。原先內容歸檔喺2018-07-18。喺2018-07-18搵到。
{{cite news}}: Cite has empty unknown parameter:|dead-url=(help) - ↑ 〈倫常血案扯上政治立場 親建制網媒引文捱批〉。成報。2018-06-22。原先內容歸檔喺2018-07-18。喺2018-07-18搵到。
{{cite news}}: Cite has empty unknown parameter:|dead-url=(help) - ↑ 〈英華午會談修例 女生抨立場偏頗〉。星島日報。2019-06-26。原著喺2019-06-27歸檔。喺2019-06-27搵到。
- ↑ 〈英華女校邀張達明講解修例受質疑〉。信報。2019-06-25。原著喺2019-06-27歸檔。喺2019-06-27搵到。
- ↑ 11.0 11.1 徐緣 (2019-06-26)。〈由英華女生短片說起 — 德國校園政治中立源由〉。立場新聞。原著喺2019-06-28歸檔。喺2019-06-27搵到。
- ↑ 李家樑 (2020-01-31)。〈HKG報被facebook封鎖 轉推2.0版 周融用岳飛名言表心迹〉。HK01。原先內容歸檔喺2020-02-04。喺2020-02-04搵到。
{{cite news}}: Cite has empty unknown parameter:|dead-url=(help)