MIDI

MIDI（英文：Musical Instrument Digital Interface，音樂數碼介面）係種電子網絡傳輸協議，用來將某種輸入裝置（通常係電子樂器，例如數碼鍵盤等等）嘅訊號傳畀電腦、手機或者其它舞台設備，又或者掉轉係由電腦、手機等等用訊號話畀樂器（例如合成器、甚至可以係有 MIDI 功能嘅傳統樂器，例如鋼琴或者管風琴等等）聽要彈乜嘢。所謂網絡係指樂器同電腦之間嘅互相連接、調整同埋同步，用嘅可以係特別嘅 MIDI 綫同 MIDI 頭，亦都可以係 USB。

MIDI 並唔直接將頻率數碼化，而係將音高、大細聲等等嘅概念以單字節嘅整數代表，所用嘅樂器亦都係單字節嘅整數，所以 MIDI 檔案會好細，但係實際播嘅聲要視乎播嘅時候用嘅樂器。