Plaxton
Plaxton係英國一間巴士及客車車身製造廠，現時隸屬亞歷山大丹尼士。
歷史
[編輯]Plaxton喺1907年成立，最初係做建築行業，第一次世界大戰後開始出汽車車身。第二次世界大戰期間，Plaxton生產停頓，間廠改出軍用飛機。
1980年，巴士車身製造廠Reeve Burgess成為Plaxton附屬公司，後來Reeve Burgess出咗Beaver小巴車身同埋Pointer中型巴士車身，兩款車身都喺市場上取得成功。1991年Plaxton閂咗Reeve Burgess並將呢兩款車身收為己用。
而Plaxton同同屬巴士車身製造廠嘅都普係老對手，1989年Plaxton收購多款都普產品嘅生產權。而喺同一年，Plaxton收購Henlys，公司全名改叫Plaxton集團，1992年再改名為Henlys集團，但Plaxton牌子就繼續保留。
1995年，Henlys集團將Northern Counties收購，並喺1999年以Plaxton完全取代Northern Counties呢個名。
2001年，Henlys集團同擁有丹尼士車廠同埋亞歷山大車身公司嘅Mayflower Corporation合組一間叫TransBus International嘅公司，Plaxton呢個名俾TransBus取代。2004年3月31號，TransBus連同佢嘅大股東Mayflower Corporation一齊被接管。同年5月17號，TransBus客車及小巴車身生產業務（包括位於Anston同埋Scarborough嘅廠房）俾管理層收購，並用返Plaxton呢個名。Plaxton獨立之後，喺2005年再出返城市巴士。
2007年5月，Plaxton俾亞歷山大丹尼士收購，令原本TransBus分開咗嘅業務合番埋[1]。同年稍後，亞歷山大丹尼士Enviro 200車身生產移入Plaxton喺Scarborough嘅廠房。
2010年1月1號起，Plaxton公司完全併入亞歷山大丹尼士嘅公司架構之內，而Plaxton呢個牌子名就繼續用落去[2]。
參考
[編輯]- ↑ "busandcoach.com - Plaxton bought by ADL". 原著喺2007年11月6號歸檔. 喺2009年8月31號搵到.
- ↑ "busandcoach.com - ADL avoids redundancies". 原著喺2011年4月20號歸檔. 喺2010年1月1號搵到.
