Talk:傳統字

改名

啦啦啦，又係定名問題啦，同talk:簡體中文一樣我認為要重新起名，不過相比簡體中文有個官方嘅名叫「簡化字」，繁體中文呢度要詳講一番。

• 首先，唔應嗌做「文」，因為講緊嘅係「字」，而非「文」，若果話係講「官、蘇、粵白話文」「文言文」，定名爲「文」緊係得，但而家講嘅係漢字體系（有字表嘅），無論係咩文，都可以呢兩個唔同嘅體系寫出來，顯然唔係講緊「文」嘅問題（若果話係港式中文、臺灣中文、星馬中文、大陸中文，討論其中語法、語彙之類則可以叫「文」）
• 既然講嘅係「字」，當然用「字」字尾，噉前邊點定名？我認為，應該定作「傳統漢字」。因為，簡繁之爭有太多政治因素，以維基中立支柱睇，我哋唔應該表個乜嘢態。
  • 唔叫「繁體字」，因為歷史上並無所謂「繁體」嘅稱呼，得「正體、俗體、訛體」之類嘅稱呼，而呢套系統沿襲傳統，並無對傳統漢字作咩繁化，唔應叫「繁體」。
    • 「繁體」之名，實質係大陸推出「簡化字」之後安畀傳統漢字嘅名。正因如此，反對簡體嘅人睇落，係對傳統漢字嘅誣衊（「繁」暗示傳統漢字繁瑣）。
  • 唔叫「正體字」，因為呢個名係臺灣嗰邊提出嘅，話畀人聽入面無政治意味搵鬼信咩？而且「正體」概念應該係相對「俗體」而言，而非相對「簡化字」而言。睇返臺灣出嘅表，會發覺佢同香港、韓國嘅傳統漢字字表有出入。而實質上，臺灣嘅字表，唔係「正」得曬，舉例：

1. 臺「裡」港「裏」，「裏」先係正體，而「裡」係俗體。
2. 臺「麵」港「麪」，同樣香港寫法先係正體，而臺灣取俗體。

而臺灣嘅寫法亦唔係最古嘅，典型嘅「鄉」「鎮」「概」「既」，韓國寫法係「鄕」「鎭」「槪」「旣」，重傳統過臺灣。

• • • 而「正體」呢個名喺大陸嘅爭議好大，支持簡體嘅人會視之爲攻擊。亦係政治爭議多多。

講完「正體字」「繁體字」嘅稱呼點解唔得取後，講下點解用「傳統漢字」嘅稱呼。

1. 好自然，「傳統」呢個名夠中立，唔涉及以上兩個名背後嘅意識形態之爭，話呢個體系「傳統」「沿用落今日」「過去用嘅就係呢個體系」，係不爭事實。
2. 然後作為漢字愛好者，要講明，呢個體系，同 韓國漢字、日本舊字體、越南儒字 係一脈嘅。雖然喺具體嘅寫法、用字上面，呢幾個國家都同中國有輕微差異，但都未大到成為唔同嘅體系。呢篇文章講嘅係「字」，實質上講嘅係舊時東亞同文，亦即唔只中文咁簡單。
3. 用「傳統漢字」呢個名，就可以概括到呢個同文體系。至於呢個體系入面嘅具體寫法、地區差異，可以喺「常用國字標準字體表」（臺灣揀字、寫法）、「常用字字形表」（港澳）、「朝鮮漢字」、「舊字體」（日本）、「儒字」（越南）慢慢講。

其實我之所以諗到改呢個名，係因為我計劃從韓文維基翻譯一啲內容入來，見佢哋噉樣處理而受啟發，自己諗落，又真係幾啱。（當然韓文嗰邊定名做「正體字」係佢哋韓文嘅講法，我哋粵文身陷簡繁之爭、實屬無奈，直到而家都有廣東人要求開簡體版，唔肯用繁體寫嘢）--S7w4j9 (傾偈) 2014年3月5號 (三) 08:16 (UTC)

改名可以，不過衹限篇文，其它地方（例如「繁簡字轉換架生」個名之類）唔會受今次討論結果影響。--William915（傾偈） 2014年3月5號 (三) 08:41 (UTC)

呢個本來係啊，就好似中文嗰邊講到臺灣問題都會好小心講成「中華人民共和國」「中華民國」，但唔涉及政治時會講成「大陸」（甚至「中國」）「臺灣」一樣啫嘛。--S7w4j9 (傾偈) 2014年3月5號 (三) 08:56 (UTC)

已經按照WP:傳統字同簡化字，改名做「傳統字」，同時避免好無謂嘅「漢字」/「唐字」之爭。--William915（傾偈） 2014年3月10號 (一) 08:35 (UTC)