Talk:李香蘭

一啲評述

李香蘭確實係個奇女子。佢嘅身份奇，話就話係日本人，但話佢係中國人一啲都冇錯。佢嘅氣質非常之中國化，睇佢啲相，佢着旗袍風姿綽約，着和服個人好似撘咗唔少噉，完全就係個中國美人。雖然佢隱瞞自己嘅身份，但從啲人反應睇，佢十足十就係個華人。因此，喺我眼中睇來，李香蘭既係日本人，亦係中國人，係中國嘅契女。佢相繼畀李家同潘家收做契女，都起咗各自嘅中文名，所以佢本身就係中國人，我喺分類度都加咗李氏同潘氏兩類，表明佢有華人嘅文化身份。李香蘭有一首《何日君再來》，先後用中、日二語演唱，都駕馭到啱啱好，非常之明白無誤噉表明佢既係漢族，亦係和族嘅身份。我抑制住，先至冇喺民族欄度填埋漢族上去。

李香蘭呢種雙重文化身份，一般來講係福事，因爲溝通唔同嘅文化，有住豐富嘅人生體驗，但喺嗰個戰爭年代，佢就係件禍事，因爲，你都唔知企邊個好。李香蘭畀中國人指責係賣國賊，日本人指責佢係支那人，晚年唯有以「日本爲父、中國爲母」來聊以自慰。講真，戰爭真係一種悲劇，佢嘅悲劇在於佢冇意義，花費巨大嘅代價做咗件冇意義嘅事。戰爭呢種爭鬥在於敵我劃分，但對於李香蘭呢種雙重身份嘅人來講，究竟要企邊邊？任何一方嘅「敵人」都係佢自身嘅一部分，實在實在係苦惱啊。

我學越南文，就諗起中越開戰時，越南華人嘅處境。喺生你、養你嘅越南，定係祖國嘅中國？祖國喎，點解唔支持？但越南嘅土地出產嘅米餵大你，你可以反骨？呢陣時真係尷尬。同樣尷尬嘅係中越兩國嘅檻界民族，素來「認族唔認國，認親唔認界」，何況山河相依，原野相接，兩地通婚、交流好多，兩邊都係親戚，幫邊個好？唯有話「你哋中國同越南打交打個夠，我哋呢啲第三方勢力當睇戲」。呢種跨界身份，就好似廣州人有幾多個冇香港親戚？香港同廣東條界再犀利，都鎅唔斷省港同源同根、同命同浮沈嘅關係。但中港一衝突，我哋廣州人就幾尷尬嘞。

戰爭真係唔好玩，淑子小姐喺謝退影壇歌壇後從政，就係爲中日友好奔走，佢呢種人深知和平嘅緊要，佢嘅使命感、淑子小姐嘅心意，希望啲讀者可以領受、明白。我呢位編者、筆者，亦希望各位面對各種問題時，唔好成爲好戰分子，尤其係家下呢種多事之秋，因爲戰爭的確係悲劇，唔好做呀。--S7w4j9 (傾偈) 2017年2月21號 (二) 10:20 (UTC)