User:Al12si/archive/1

我係港裔加拿大人，喺安省美術設計大學畢業。

對引文嘅意見

我明點解有人想乜都有出處，因為真係會記錯嘢，亦都真係有人想搞破壞，但係其實呢個要求好唔合理，而粵文維基嘅人應該好明白。

撇開粵文維基人可能遇到嘅特有問題，單單係睇專業知識，就算係喺英語世界，好多專業知識都係口傳，你係搵匀全世界都唔會搵到出處（或者搵到嘅嘢都係行外人廢噏），但係你做某行業，或者讀過某科，你就會覺得嗰啲嘢根本係常識，要寫出處係發神經。

呢種情形，我以前寫英文維基嘅時候經常遇到。最荒謬嘅係我甚至唔使講乜嘢陶瓷製作，就算係文字編輯、平面設計或者排版呢啲好似網上好多資料嘅行業，其實好多知識都係口傳，就算喺網上面，好多資料都係私人羣組、要入密碼甚至係付費會員專利。

例如我啱啱寫咗少少嘢講加新社格式，但係冇出處。我有搵，但係堅係冇；但係你喺加拿大做文字篇輯，特別係做過報館或者大學網站，都知加新社格式係乜。

又例如喺英文維基，SDGQ（魁省平面設計協會）嘅文已經被人剷走，話唔重要云云，出處都係淨係得個會嘅網站云云；但係如果你係一個明白加國政情嘅加拿大平面設計師（唔係任何一個阿水加拿大人），即使唔係魁省省民，都應該知 SDGQ 非常重要。點解？因為其餘兩個會⸺安省嘅 RGD（安省註冊平面設計師協會）同所謂全國嘅 GDC（加拿大平面設計協會）⸺都係淨係講英文（有法文名，但係從來唔用法文），淨係得 SDGQ 講法文。任何加拿大人都知，無理剔除一個全國唯一嘅法文組織都會係好有問題嘅做法，但係偏偏英文維基就做咗咁嘅嘢。

魁省如果要獨立，英文維基絕對有責任。

利申：我唔係魁省省民。