三項鐵人
三項鐵人（英文：triathlon），又叫三項全能，係由三項運動組成嘅比賽，現代比賽通常係由游水、踩單車、跑步三個項目順序組成，運動員需要要一氣呵成連續完成三個運動項目，轉換項目嗰陣換衫同換鞋嘅時間亦計算喺比賽時間之內。所以如果運動員只係擅長其中一項，並唔代表比賽會佔有優勢。運動員喺進行比賽之前，需要有適當嘅訓練方式去鍛煉體能同耐力，以確保每個階段都能夠順利完成。
三項全能喺中文世界裏面更廣泛咁稱之為「三項鐵人」。但實際上，「三項鐵人」嘅英文名（Ironman Triathlon）係「世界鐵人公司」（WTC）嘅註冊商標，只係用喺WTC舉辦嘅三項全能賽事，而且具有特定嘅賽程，可以當做三項全能嘅一種。「世界鐵人公司」嘅三項鐵人運動賽事具有好高嘅影響力同埋知名度，令「三項鐵人」成為「三項全能」嘅代名詞。
