五月風暴

1968年巴黎街頭表達政治訴求嘅海報。

五月風暴（法文：Mai 68）係1968年5月法國巴黎爆發嘅一場學生運動。

起因

二戰結束之後，為咗應對嬰兒潮帶來嘅人口膨脹，法國嘅高等教育亦都開始膨脹，從1950年代開始不斷增加學額同教席。但係學額嘅過度增加導致學位貶值，而新增嘅教席大多數都係合約講師，待遇低終身教授一等，而偏偏爾低新增嘅學額同教席都集中係新興嘅社會科學道。於是，大學畢業生同社會科學講師成為五月風暴嘅主要人物。

經過

支持學生運動嘅罷工工人。

1968年3月22號，巴黎大學文學及社會科學系（今日嘅巴黎第十大學）嘅學生，為咗要求校方批准男生進入女生宿舍而佔領學系行政大樓。示威好快波及到巴黎大學其他校區。

5月3號，警方進駐巴黎大學索邦校區，同示威學生發生衝突，結果導致481人受傷，其中包括279名學生同202名警員。

5月10號同11號，超過12000名學生喺拉丁區示威，示威嘅唔單止有大學生同大學講師，甚至重有中學生；警方派出超過6255名警員應對示威者，雙方發生激烈衝突，導致巴黎各地發生63次火燭，125部車被人燒毀。時任法國總統戴高樂表示絕對唔容許街頭暴亂，但係騷動好快波及到外省城市。

5月11號，時任法國總理龐比度返到法國之後，力主用溫和手法平息運動，唔單止釋放被捕學生，重重新開放巴黎大學。但係為時已晚。5月13號，各地工會發動全面罷工，支援學生，矛頭直指戴高樂。5月20號，罷工已經令到成個法國陷於癱瘓。

就喺而個時候，各個左翼政治人物都開始表態支持學生運動。五月風暴由此由學生運動演變成要求戴高樂落臺嘅政治運動。5月27號，由總理龐比度同各大工會代表談判達成嘅《格勒尼爾協議》被工會成員投票否決，各大工會於是決定喺5月29號發動大遊行，逼戴高樂落臺。5月28號，左翼聯盟領袖密特朗宣佈，如果戴高樂落臺嘅話，佢會推舉前總理皮耶·孟德斯－傅朗斯出任看守總理，而自己就會參加總統大選。

喺爾個緊張關頭，戴高樂為咗防備遊行人士包圍總統府而秘密離開，去西德巴登－巴登嘅法軍駐地攈法國駐德部隊總司令澤·馬雪。戴高樂喺確定軍隊會支持佢之後，喺5月30號發表電視講話，宣佈解散國民議會，重新選舉，但唔會撤換總理龐比度。戴高樂更加喺當晚組織咗100萬人進行反示威。同年6月嘅國民議會大選，戴高樂嘅右翼大勝，奪得國民議會超過3/4嘅議席。五月風暴結束之後十幾年，左派一直處於弱勢。

為咗避免再有學運爆發，戴高樂政府將巴黎大學拆分成13座互不相屬大學。但係五月風暴所暴露出來嘅問題並未就此消失。一年之後，由於修憲案過唔到全民公投爾關，戴高樂黯然辭職。