城市論壇

《城市論壇》（英文：City Forum）係香港電台電視部製作嘅一個討論民生問題、文化教育、財經、法制等議題嘅直播時事論壇節目，喺1980年4月13日啟播，每集大概45分鐘。逢禮拜日，《城市論壇》主要喺銅鑼灣維多利亞公園度舉行，並透過電視同電台直播，亦曾經喺其他地方舉行，例如金紫荊廣場、尖東百週年紀念公園，賈炳達道公園（即係原本嘅九龍城寨）等。節目類似英國倫敦海德公園嘅時事辯論。

《城市論壇》自1980年啟播以嚟都喺無綫電視翡翠台播放，但係喺2016年9月18號開始，無綫主動提出停播呢個節目，因此，隨住翡翠台取消直播呢個節目同改為重播自製節目，《城市論壇》只係喺港台電視31、31A同步直播，有啲前主持人對有關安排都感到可惜。

2020年2月2號開始，由於受到武漢肺炎影響，《城市論壇》暫時改喺廣播道香港電台電視部錄影廠舉行，不設現場觀眾，原本現場觀眾發表意見改為電話專線發表意見。經過二十個禮拜之後，「限聚令」放寬，論壇喺6月21號實行防疫措施之下喺大廈外嘅空地重設現場觀眾。後嚟由於疫情反覆，節目喺上半年季度嘅最後一集（7月19號）再次取消現場觀眾安排，但仍維持戶外直播。

2021年7月18號播出2020–21年季度最後一集之後，香港電台並冇喺同年9月開始播出新一季度嘅《城市論壇》。