奧運舉重

2016年里約熱內盧奧運會男子舉重運動員

2012年倫敦奧運會女子舉重運動員

舉重，係一項歷史悠久嘅運動，將槓鈴以雙手舉起過頭，舉起槓鈴嘅總重量最重嘅就贏。

奧運舉重早喺1896年奧林匹克運動會就已經列入正式項目，當時剩係得男子組。直到2000年嘅2000年夏季奧林匹克運動會，女子舉重先至列入正式項目，雖然早喺1987年世界舉重錦標賽就已經有女子項目 。

比賽規則

舉重比賽有兩種姿勢，分別係挺舉同抓舉。成績係以兩種姿勢嘅總和計算，但係如果其中一種冇成績，就係失敗。抓舉指一次性將槓鈴舉過頭頂嘅運動，挺舉可以畀運動員先將槓鈴平舉至齊胸，然後再舉過頭頂，但係兩次舉槓鈴嘅動作都一定要一次完成，中間唔可以有任何停頓，要喺裁判員發出信號之後先至可以放低槓鈴。正式比賽先進行抓舉，再進行挺舉。抓舉三次試舉失敗就失去比賽資格，唔可以再進行挺舉比賽。

挺舉同抓舉各有三次機會，運動員喺嗰場比賽之前兩個鐘開始磅重，較輕嘅舉先，之後較重嘅舉，每次試舉之後休息分半鐘。裁判系統需要三盞白燈、三盞紅燈同一個蜂鳴器。比賽臨場裁判員三名，分別係左側裁判員、右側裁判員同中間裁判員。三名裁判員各自控制一盞白燈同一盞紅燈。裁決嘅時候，喺三個唔同嘅角度判定。三盞白燈代表成功；三盞紅燈代表失敗。如果兩白一紅或兩紅一白，噉就要少數服從多數，兩白一紅代表成功，兩紅一白代表失敗。

試舉成功之後，每次可以增加1公斤為單位嘅試舉重量（之前曾經係2.5公斤），總成績嘅名次以抓舉同挺舉夾埋最高成績決定。如果成績相同，就畀體重比較輕嘅選手贏，如果體重都一樣，就畀首先試舉成功嘅選手贏。