威廉·安德斯

威廉·安德斯（William Alison Anders，1933年 10月17號—2024年 6月7號）係一位美國太空總署嘅太空人，曾經執行阿波羅8號任務，係人類探索太空史上首次離開地球引力、首次圍繞月球飛行嘅太空人，亦都係第一個喺香港出世嘅太空人。

安德斯嚮香港出世，阿爸係美國海軍軍官 Arthur Anders，阿媽係Muriel nee Adams。好細個嗰陣跟住父母返美國，之後因為阿爸被召返中國，佢同阿媽又跟住去咗南京。1937年，因為日軍侵華，佢阿媽又帶佢逃離中國，去咗菲律賓。

佢22歲喺海軍軍校讀咗個電機工程學位，跟住加入美國空軍，重喺空軍科技學院攞咗個核子工程碩士學位。第二年正式成為戰鬥機機師。1963年，安德斯被揀為美國太空總署第三組太空人成員。

1968年12月21號，安德斯同 Jim Lovell、Frank Borman登上火箭土星5號，執行人類探索太空史上第一次載人飛越低地球軌道嘅任務。喺繞月飛行嗰陣，幾個太空人見到寶石一樣嘅地球，安德斯立即用佢部哈蘇相機（Hasselblad 500 EL）影低。世界各地嘅人見到張相，大為驚嘆，激發起全球嘅環境保護運動，簡接促成自 1970 年開始每年一度推廣環保意識嘅「世界地球日」。國際環保組織地球之友（英文：Friends of the Earth）同綠色和平就分別嚮 1969 年同 1971 年成立，美國政府亦都嚮 70 年成立環保局。

1970年，國際天文學聯合會為咗表揚安德斯，將月球南半球一個隕石坑命名為「安德斯隕石坑」（英文：Anders Crater）。1993 年，退咗休嘅安德斯成立咗一個基金會，專門籌集善款去支持教育同環保項目。

2024年6月7日，安德斯獨自駕駛嘅舊式T-34型飛機，喺美國華盛頓州聖胡安群島附近海域墜毀，佢喺事故中死亡，終年90歲。

參考

〈記錄地球升起一刻啟發環保運動香港九十年前今日誕下這位太空人〉。《yahoo!新聞》 (繁體中文)。喺2023-10-18搵到。
〈阿波羅8號太空人威廉安德斯墜機身亡　曾拍攝「地出」(地球升起)經典照片〉。《橙新聞》 (繁體中文)。喺2024-06-12搵到。