慕尼黑協定

英國首相張伯倫喺機場對群眾揮舞著同希特勒簽署嘅和平協定，1938年9月30號

慕尼黑協定（英文：Munich Agreement；捷克文：Mnichovská zrada；德文：Münchner Abkommen）係容許納粹德國吞併捷克斯洛伐克嘅蘇台德地區嘅一份協議，1938年9月30號由英國、法國、德國同埋意大利簽訂。

概要

1938年3月，納粹德國實踐德奧合併後，開始注意下一個侵略目標捷克斯洛伐克。由於靠近兩國邊境嘅捷克斯洛伐克嘅蘇台德地區有300幾萬德意志族，一方面，總理希特勒指使納粹黨徒同部分民眾要求「民族自治」、「脫離捷克斯洛伐克」；另一方面，希特勒又聲稱唔能夠容忍德國境外嘅德意志族受到「欺侮」，要同佢哋「伸張正義」，準備用軍事行動「掃蕩捷克」，為佢屯兵邊界創造輿論條件。希特勒喺9月12號威脅話，如果捷克斯洛伐克政府唔畀蘇台德地區嘅德意志族「公平待遇」，德國就會採取行動。而捷克斯洛伐克政府自然亦唔願任人宰割，亦開始局部動員，加強邊界嘅作戰兵力。

由於第一次世界大戰之後，捷克斯洛伐克喺英法保護下恢復咗主權，同法國簽訂咗互助條約，所以如果德國同捷克斯洛伐克交戰，英法按照條約必然捲入戰爭。9月13號，法國內閣開咗成日會，以尋求對策。當晚，總理達拉第決定請英國首相張伯倫出面調解。

9月13號晚，英國首相張伯倫發畀希特勒一封十萬火急嘅電報，話要同希特勒見面，希望「和平解決」呢個問題。

9月15號張伯倫飛去德國。會面結束後，張伯倫連夜趕返倫敦，同法國人一齊向捷克斯洛伐克政府施壓，要佢哋根據民族自決原則解決蘇台德地區問題。

9月22號希特勒又提出新要求：捷克斯洛伐克境內以德意志族為主要居民嘅地區必須由德國軍隊立即佔領，捷克斯洛伐克軍隊必須喺9月28號冚唪唥撤出蘇台德地區。

對此，捷克斯洛伐克政府唔單止表示拒絕，重宣布全國總動員。

9月27號，希特勒下令德軍7個師進入德捷邊界前沿陣地。由於9月28號係希特勒要求捷政府答覆嘅最後期限，捷克斯洛伐克無意接受佢嘅要求，為防止不測，重下令立即徵召100萬兵員。戰爭好似一觸即發。

9月29號，張伯倫第二次飛德國。當日，喺慕尼黑召開咗由希特勒、墨索里尼、張伯倫、達拉第參加嘅德意英法四國首腦會議，規定將蘇台德區「轉讓」畀德國。而割讓領土嘅捷克斯洛伐克，就冇權出席會議。呢個就係著名嘅「慕尼黑協定」。

9月30日，捷克斯洛伐克政府表示拒絕呢個協定，但英法話，如果捷克斯洛伐克政府唔同意噉英法就冇義務協防捷克。最終，捷克斯洛伐克政府妥協，同意割讓領土。

捷克斯洛伐克喺《慕尼黑協定》之後割畀德國、匈牙利同波蘭嘅領土用唔同顏色表示

希特勒喺呢次會議度聲稱，蘇台德地區係佢對西方嘅最後一次領土要求。張伯倫對此毫無懷疑，返到倫敦落機嗰陣，重興高采烈噉聲稱，佢帶返嚟「一代人嘅和平」。但希特勒冇口齒，喺1939年3月吞併咗捷克斯洛伐克全境。

德國人嘅反應

德國陸軍總參謀長路德維希貝克反對德國喺1938年入侵捷克斯洛伐克，認為德國咁做會搞到同英法開戰，而德國係冇勝算，但係當時德軍高層得佢一個敢當面反對希特勒嘅計劃，最終貝克喺8月辭職，而希特勒叫佢暫時唔好公佈佢辭職嘅消息。

之後

捷克斯洛伐克總統愛德華貝奈斯喺1938年10月辭職。1945年德國投降後，蘇台德地區重新畀返捷克斯洛伐克，喺蘇台德地區嘅德裔居民大部份都畀捷克斯洛伐克驅逐出國。