明石燒

明石燒

明石市一間明石燒小食店嘅餐牌。餐牌上邊寫住「玉子燒定食」而唔係「明石燒定食」。

明石燒（日文：明石焼きあかしやき^(Akashiyaki)）係日本關西一種地方小食，睇落同章魚燒相似，但製作方法唔同。明石燒源自兵庫縣明石市，喺兵庫縣至大阪市一帶比較常見。

名

喺明石市周邊嘅東播磨地區（特別係加古川市、高砂市、播磨町、稻美町）、神戶市西部（譬如西區、垂水區、須磨區），當地人嗌佢做「玉子燒」，但喺第啲地方叫「明石燒」，費事同第種「玉子燒」溝亂。

做法

麵粉、蛋同水攪勻，開成粉漿。將粉漿倒入有凹位嘅燒熱嘅鐵板，加入八爪魚，時不時用筷子翻轉，燒成球型。

同「章魚燒」嘅分別

明石燒嘅雞蛋含量高過章魚燒。另外，明石燒會跟昆布高湯，所以又有人話明石燒係「有得飲湯嘅章魚燒」。舖頭亦會提供醬料，等食客可以選擇抆啲醬落明石燒，就噉乾食。

睇埋

• 章魚燒

出面網頁

• YouTube上面嘅明石焼（玉子焼）嘅製作同品嚐
• 明石市政府嘅介紹（日文）
• 明石觀光協會嘅街招（日文）
• 明石燒，傳統嘅蓬鬆感：章魚燒同相似嘅味道（日文）