步天歌

現今鄭樵通志所傳版本

步天歌，歌一首，七言，講及全天星官分佈。步天歌只傳靈臺，即只限於天文官內傳。

步天歌出自大唐王希明之手，丹元子為王希明別號，皆因唔見於隋書等。然而亦有睇法，王希明潤飾過步天歌，原作為更早嘅丹元子。

大唐出土文物，並唔見步天歌。其他類似天象歌賦，諸如玄象詩、觀象賦、周天大象賦，以三家星排列，近大唐之初，李淳風一系。步天歌擺脫依種排法，更加方便記述，奠定今日佈局。三垣二十八宿格局，為步天歌所奠定。不過，步天歌仍有赤黑黃等字，乃三家星記注。步天歌三垣，唔叫垣，而叫宮。宮內城牆叫蕃。

由於為靈臺之人相傳背誦，而歌又長，用字章句有異，就出咗好多流傳版本。現今並無大唐文物，證明到邊個版本先啱，只能由傳世一眾版本，夾個至合理。

步天歌有幾種排列方式。早年應以二十八宿為先，三垣為後，後尾就倒轉。就算三垣次序，亦有唔同。初時為天市、太微、紫微、後來又變太微、天市、紫微，到後期化為紫微、太微、天市。早年應以觀測重要而排列，二十八宿同天市、太微，靠近黃道，七曜所行經，變異甚多。後期就北極紫微為首，統轄全天。