涼茶

涼茶係喺廣東一帶好流行嘅嘢飲。

廣東一帶地方嘅天氣係屬於典型嘅亞熱帶氣候，夏天好熱，多雨又潮濕，水質就偏向燥熱，而且夏天嘅炎熱時間比較長，再加埋廣東人鍾意食啲煎炒燥熱嘅嘢食，又習慣夜瞓。因為天氣又熱又潮濕，再加埋飲食唔啱，同瞓唔夠等等嘅原因，好容易令人熱氣，所以民間就流行用啲藥性寒涼，消暑解毒嘅中草藥，煲水嚟飲。呢啲各式各樣嘅藥飲就叫做「涼茶」。涼茶可以消除夏天人體裏面嘅暑氣，同冬天乾燥引起嘅喉嚨痛等嘅疾。有甜嘅、酸嘅、苦嘅涼茶，款式多多。

涼茶係有好多唔同嘅種類，其實每個屋企都有佢自己稍為唔同嘅配方。

常見嘅涼茶有廿四味、五花茶、雪梨茶、感冒茶等等。喺廣州、香港、澳門等等嘅地方甚至有專門賣涼茶嘅舖頭。有啲喺廣州嘅涼茶舖更加係有超過一百五十年歷史，喺香港亦有唔少五、六十年歷史嘅涼茶舖。而近呢十幾廿年亦都有集團將涼茶包裝成紙包或者罐裝飲品嚟賣，好似王老吉涼茶咁。

傳統上，涼茶要喺灘凍咗之後先飲。而一般嘅涼茶都係接近黑色嘅，而涼茶嘅味道多數係苦中帶甘。

經粵、港、澳三地政府喺2006年 2月努力爭取，涼茶獲中國國務院列為518種「國家級非物質文化遺產」之一。

唔同嘅涼茶種類

涼茶發展到而家，大致可分為以下三種類型：

傳統涼茶

傳統嘅涼茶多數係深啡色，飲落苦澀，多數有埋藥用性質。所以俗語都有話「苦口良藥」。但係多數人係唔會無端端飲啲傳統涼茶。當啲人有啲乜頭暈身㷫，感冒發燒，周身骨痛，喉嚨痛等等情況，先會飲啲對症下藥嘅涼茶。

傳統涼茶，多數歷史比較悠久，配方多數嚟自民間，有啲亦自稱係祖傳古方，好似黃振龍㿀痧涼茶，聽講已經有八十幾年歷史，係袓傳古方，可以醫全身酸痛、皮膚班塊石疹點等嘅病，但呢隻涼茶藥性偏寒，年老體弱、氣血兩種虛者同孕婦都係唔太適合飲嘅，佢嘅藥方係由火炭母、淡竹葉、崗梅根、金錢草、大頭陳、救必應、鑑銀盤、五指柑等等組成。

廣州王老吉涼茶

廣州王老吉涼茶係由崗梅根、木蝴蝶、火炭毋、金錢草、布渣葉、淡竹葉、金沙籐、五指柑、山芝麻、金櫻根十味藥組成，呢啲藥大多數都係廣東民間嘅草藥，功效係清熱解暑等等。對發熱、喉痛、聲沙、口苦尿黃，泄瀉、腹痛等等嘅胃腸濕熱病都有用。

香港廿四味涼茶

據調查香港廿四味涼茶未必係由二十四組唔同嘅藥組成，有啲實際上用咗三十幾種藥嚟做添，但啲人多數通稱佢做二十四味涼茶，佢有清熱去濕作用，對外感風熱、發熱喉痛，咽喉過多長期熬夜而引起嘅唔適服都有作用。

保健涼茶

呢類涼茶同傳統涼茶有啲唔同，佢唔係專門針對某一種病，而係適合所有健康嘅人飲，有清熱消暑等嘅保健作用，同時，佢嘅顏色偏淡，味道冇咁苦澀，多數會有甘甜嘅味道，所以比較受歡迎，好似羅漢果五茶花、菊花雪梨茶同銀菊露，可以防止肺燥咳嗽，或者肝火眼痛，或者唔易中暑，從而起到保健預防嘅作用。

劑型

涼茶嘅劑型發展到今日，已經變成多種多樣，最初淨係有涼茶劑型，佢係由藥物磨粉同粘合劑混合而成嘅一種固體製劑，飲時用熱水泡汁代茶飲用，所以又叫做茶劑，形狀多數係小方塊形或者長方塊形，出面用紙合包住，好似甘和茶、合仔茶同午時茶等。之後亦都有啲做成湯劑嘅，即買即飲，呢種劑型到而家仍然比較普遍，近嚟重發展到沖劑型、易拉罐型同茶包型等等。

香港連鎖式涼茶舖／品牌

喺香港，由於涼茶好廣受歡迎，所以亦衍生咗一啲連鎖式涼茶舖同品牌，例如係養和堂、海天堂、鴻福堂等。除咗有涼茶舖外，佢哋亦透過超市等渠道售賣枝裝涼茶。

連出去

閒話涼茶
涼茶榮升國家文化遺產—明報新聞網