熱氣球

熱氣球係利用熱空氣嘅密度低過常溫空氣密度而產生浮力嘅原理嚟飛行嘅。產生嘅浮力超過氣囊同附帶物體（譬如吊籃呢啲）嘅重量嗰陣，氣球就會上升。熱氣球主要通過自帶嘅機載加熱器嚟調整氣囊入邊空氣嘅溫度，嚟達到控制氣球升降嘅目的。必要嘅時候重可以用拋棄壓艙物嘅方法嚟改變飛行狀態。佢可以用嚟運載觀測儀器同乘客。

熱氣球喺中國已經有好耐歷史，嗌做天燈或孔明燈，知名學者李約瑟亦指出，西元1241年蒙古人曾經喺李格尼茲（Liegnitz）戰役入便用過龍形天燈傳遞信號。法國嘅孟格菲兄弟喺1783年先至向空中釋放歐洲第一隻內充熱空氣嘅氣球。

安全問題

熱氣球慢起慢落，一般相信係安全嘅，不過超載、氣球皮料老化、遇風切變、燃料漏氣、或者俾外物鈎到都會失事。[1]

歷史

最早嘅熱氣球天燈喺公元2或3世紀喺中國發明，用做傳遞軍事信號。

18世紀，法國造紙商孟格菲兄弟重新發明咗氣球。因受碎紙屑喺火爐中不斷升起嘅啟發，用紙袋聚集熱氣做實驗，令到紙袋能夠隨住氣流不斷上升。

1783年6月4號，孟格菲兄弟喺里昂安諾內廣場做公開表演，一個圓周110英尺嘅模擬氣球升起，飛咗1.5英里。

同年9月19號，喺巴黎凡爾賽宮前，孟格菲兄弟為國王、王后、宮廷大臣同埋13萬巴黎市民做咗熱氣球嘅升空表演。

同年11月21號下晝，孟格菲兄弟又喺巴黎穆埃特堡做咗世界上第一次載人空中航行，熱氣球飛咗二十五分鐘，喺飛越半個巴黎之後降落喺意大利廣場近鄰。呢次飛行比萊特兄弟嘅飛機飛行早咗成120年。

第二次世界大戰以後，高科技令到球皮材料同埋致熱燃料得到普及，熱氣球成為唔受地點約束、操作簡單而方便嘅公眾體育項目。

1980年代，西方嘅熱氣球引入中國。1982年美國著名刊物《福布斯》雜誌創始人福布斯先生揸住熱氣球、電單車旅遊嚟到中國，自延安到北京，完成咗揸熱氣球飛臨世界每個國家嘅願望。

熱氣球作為一個體育項目日趨普及，佢曾創造上升34668米高嘅記錄。1978年8月11至17號，「雙鷹3號」成功飛越大西洋，1981年「雙鷹5號」又成功跨越太平洋。