種族衝突

1995年嘅格羅茲尼戰役期間，一個車臣人喺度祈禱（由米哈伊爾·埃斯塔菲耶夫拍攝）

1994年盧旺達大屠殺後，喺扎伊爾（依家嘅剛果民主共和國）為流離失所嘅圖西族所起嘅難民營

種族衝突（英文：Ethnic Conflict）係指兩個或以上嘅族群爭奪而造成嘅衝突。造成衝突嘅原因可能涉及政治、社會、經濟或者宗教方面等因素，但無論乜嘢原因，喺衝突中嘅個體都會明確咁為自己嘅族群而戰，呢個亦係由其他鬥爭區分出種族衝突嘅標準。

種族衝突並唔一定涉及暴力。喺言論自由受到保障嘅多元種族嘅社會入面，種族衝突可能喺幾個民主國家當中係每日都會出現嘅事情。例如，種族衝突可以係為咗爭奪分給唔同族群嘅資源，而唔涉及暴力嘅鬥爭。但係，喺衝突入面參與對抗嘅主體必定係直接咁或者象徵性咁同一個族群有關。喺發達嘅多元種族民主國家入面，呢啲衝突一般已經制度化，並以國會、議會同政府部門為渠道，或者透過非暴力嘅示威同罷工等方式進行。雖然民主國家並唔能夠一直避免種族衝突升級至暴力層面，但係制度化嘅種族衝突可以保證呢啲族群能夠以一啲和平嘅方式講出佢哋嘅訴求，從而減少暴力衝突發生嘅可能性。另一方面，喺獨裁嘅體制入面，少數民族一般無法表達佢哋嘅不滿，導致佢哋嘅不滿越加劇烈，從而造成長時間嘅種族沉默，跟住就會爆發暴力衝突。所以，種族和平係指無暴力事件發生，而唔係無衝突。另外，暴力嘅種族抗爭往往令到先前被邊緣化嘅族群獲得政治上嘅權利。

造成種族衝突嘅學術解釋一般有三個主流派系：原生論、工具主義或者建構主義。政治學家都爭論種族衝突係由上至下或者定係由下至上。知識分子嘅辯論亦集中喺種族衝突係咪喺冷戰後先至普遍，以及透過例如協商民主同聯邦主義等手段制定管理衝突嘅方法。