葉利欽

葉利欽 (1997年)

葉利欽（俄文：Борис Николаевич Ельцин，1931年2月1號—2007年4月23號）係俄羅斯前總統。佢做過蘇聯共產黨中央政治局候補委員、莫斯科市委第一書記、蘇聯俄羅斯聯邦最高蘇維埃主席、同埋俄羅斯首任民選總統。

葉利欽係個充滿爭議嘅政治人物，佢喺蘇共年代因為矢言打擊貪污而聲名大噪。喺1991年6月12號佢以 57% 嘅得票率當選俄羅斯蘇維埃聯邦社會主義共和國總統，成為俄羅斯史上第一個民選總統。佢執政嗰陣推動自由市場經濟同埋民主體制，但係佢採取「休克療法」嚟令到俄羅斯由原本嘅計劃經濟盡快走上資本主義，包括放寬蘇聯時期嘅物價管制，同埋大幅削減政府開支。但係呢啲政策就令到俄羅斯經濟瀕臨崩潰，最後更加以武力鎮壓反對者。佢嘅政權亦都飽受貪污醜聞困擾。而喺任內兩次攻擊車臣，但係未能夠平息車臣分離主義分子，亦都動搖佢喺國民嘅領導地位。喺距離2000年重有幾個鐘頭之前，佢突然宣佈辭職，任命總理普京做代總統，震驚朝野，就咁完咗佢嘅政治生涯。到嗰陣，有啲人估計佢嘅民望得返大概 2% 。