貂蟬

貂蟬像

貂蟬係中國古代四大美人其中一位，後世封佢做「閉月」，相傳係東漢末年嘅人。唔同其餘三位美人，正史上無提過佢個名，好有可能只係虛構人物，小說《三國演義》入面話佢係司徒王允嘅婢女，而史書《三國志·呂布傳》提到呂布同董卓嘅婢女私通，有啲人認為個婢女係貂蟬。元代戲曲《錦雲堂暗定連環計》内話說佢係任昂個女，字紅昌，係忻州木耳村（卽後世忻州市東南嘅木芝村）人；貂蟬係管理冠冕服飾嘅官職，而曲中宮女掌貂蟬冠，所以叫紅昌做貂蟬。

歷史上，「貂蟬」指嘅係董卓嘅婢女，《三國志·呂布傳》提及「卓常使布守中閣，布與卓侍婢私通，恐事發覺，心不自安」，但正史《三國志》、《後漢書》等書中並未記錄個婢女個名。後世一啲典籍提到《漢書通志》記載咗「刁蟬」，但呢本書早已失傳，史實性已不可考，而家大多認為「貂蟬」係後世文人同董卓婢女所起嘅名，原先出現喺說書話本嘅故仔當中，最後由《三國演義》作者羅貫中整理創作出一個完整嘅形象。