運頭角
運頭角山（Wan Tau Kok），又叫鬼仔崗、圓崗、差館山、旗杆山（Flagstaff Hill），喺香港新界，係大埔運頭角一笪地方，響大埔河邊，有個山仔，地勢高過周圍。運頭角原本係海角，所以叫角，喺正大埔河出大埔海出口。後尾因為大埔新市鎮發展，填海變內陸。
運頭角曾經係新界管治中心，係理民府所在地。家下亦都學校林立。大埔墟火車站喺正佢南面。
史
[編輯]按早年英軍地圖，運頭角原本有條村，都係叫運頭角，所以佢周圍就叫運頭角。條村原本喺個山仔頂。
1898年7月1號，英國由大清手上得到新界。但接收要到1899年。香港政府揀咗呢度升旗，並立草棚做差館。期間好唔順利，因爲發生新界六日戰，戰事由此地開始。四月三號同十四號，畀人火燒草棚。呢處畀人隔山槍擊。英軍要派軍艦軍隊入大埔鎮住。十六號喺處升旗，英國正式接收新界。草棚後尾變差館。一九零七年，起咗理民府，打理全新界。後尾經過歷年分治，改為北約理民府，尾後又改做大埔理民府。所以運頭角係新界管治機要。
1910年代，運頭角南面起咗九廣鐵路。而運頭角個山，同北面一個更矮嘅山之間，有大埔公路穿過。
路
[編輯]運頭角有車路運頭角里上山，直至理民府舊大樓為止，即係家下羅定邦童軍中心。
古木
[編輯]運頭角百年來種有好多樹，曾經有木棉王，喺運頭角遊樂場側邊，係全香港最大嘅木棉，高約廿三米，樹幹直徑約一米半，樹冠覆蓋約三十米，曾經入香港《古樹名木冊》中之受保護樹木[1]。後尾因真菌入侵，根部枯死，香港政府以危害公眾安全為由，喺二零零九年十二月三號四號間斬樹。