鵝鑾鼻
鵝鑾鼻（粵拼：ngo4 lyun4 bei6，又叫做南岬（naam4 gaap3），係臺灣最南邊嘅地名，喺臺灣屏東縣恆春鎮，隔咗個巴士海峽就係菲律賓。根據臺灣日治時期嘅文獻，鵝鑾鼻當時嘅名係片假名「ガランピ」或漢字「鵞鑾鼻」。「鵝鑾」係臺灣原住民排灣族嘅語言「帆」嘅譯音，因為附近嘅香蕉灣好似船帆，所以就叫做「鵝鑾」，加上嗰度嘅地形好似突咗出嚟嘅鼻，「鼻」係指岬角，所以就叫「鵝鑾鼻」或「鵝鑾鼻半島」。
喺1982年成立嘅鵝鑾鼻公園，將21.4米高嘅鵝鑾鼻燈塔附近嘅五十公頃納入公園範圍，公園內保育咗日治時期豎立嘅「臺灣八景鵝鑾鼻」石碑。
