黃老

黃老，哲學一門，黃指黃帝，老指老子，以道家為本，加入法家、名家、陰陽家、墨家、儒家一啲原素，綜合而成。喺戰國時出現，演化成漢初七十年政治哲學，武帝劉徹後借儒術粉飾太平滿足自己，廢黃老，政治哲學為人所忘。其時司馬遷寫史記，實則以史推崇黃老。後漢道家、陰陽家合流，轉為求仙術，稱黃老道，已非漢初黃老。黃老道經張角等多代演化成道教。黃老傳世文獻唔多，至出名有淮南子，直至馬王堆漢墓，發現帛書老子，背面有其他經文，先至揭開當時黃老面貌。

黃帝為戰國突然推冒起傳說帝王，唔見於尚書，春秋時所無，記戴紛雜，綜合都難倒司馬遷。司馬遷寫史記先至定形。推斷同齊國有關，齊人好幻想，多神怪故事，亦有說田齊奪姜齊，推黃帝以示其源流。齊人好辯論，設稷下學宮。稷下學宮門生眾多，各家思想參雜，傳播到各國，尤其係法家、陰陽家。黃帝個名同陰陽五行有關，既得神格，漸漸加到各種技術，成為無所不包嘅始祖，甚至係戰國各族以至係異族嘅始祖，因此唔少著作託名黃帝，或託名黃帝臣下。

有鑑於秦因以法家苛政而亡。君法寡欲嘅黃老就代替法家，成漢初政治主流。黃老借老子道德經所言，無為而治，君主要少欲，由得民休養生息。然而黃老又同老子唔同，解釋道順天地而行，人間各有所位，重名形，君臣有上下之分，不然逆就不吉。又推崇機智，見機行事，要識睇時勢，時機未到忍耐，時機到就必須作為。臣要識睇君意，曉功成身退，以免兔死狗烹，莫為君主殉死，寧投他方。