凳，有時寫做櫈，係用來坐嘅傢俬，用板加上凳腳做成，無靠背，無𢲲手。漢朝之前原來係指畀腳踏嘅「蹬具」。
細嘅凳叫凳仔或者矮凳，長嘅凳叫長凳，橋凳或者板凳，可以摺得埋嘅凳叫摺凳，摺得埋嘅凳仔亦叫交倚。
至於有靠背／挨凭嘅「坐具」叫做椅，有得「倚」靠。
「椅，坐具後有倚者，今人俗呼椅子。」——《正字通》
凳有過千年歷史。古埃及人畫有坐凳法老王像。中國唐代之前都係坐響地蓆上面。
