狗

狗，又叫做犬，係一種常見嘅犬科哺乳動物。狗係狼嘅近親。喺15000至14000年前，狗就已經俾人類馴化做家畜。今時今日，狗種類已經有數百種。身高由十幾釐米嘅芝娃娃到近一米高嘅大丹狗都有，顏色從白色、黑色、紅色、灰色、金黃色、啡色都有。同人一樣，狗係有高度社會嘅集體獵食動物。就係因為咁，狗可以受訓。

雖然傳統上狗屬於肉食性動物，但並唔意味狗淨係食肉，狗都可以食蔬菜同五穀。

喺好多國家同地方，過去用於放牧，打獵；家下多數作為寵物，睇門口嘅家犬。亦可以做狗醫生、緝毒犬、導盲犬、警犬、太空狗。狗以各方面同人做嘢生活嘅緊密關係，得到「人類最好嘅朋友」之名。

狗呢個字本係講幼犬，不過家下狗已經取代咗犬嘅意思。

文化 [編輯]

各地對狗嘅睇法差異相當大，就算喺同一文化之下，亦有相反嘅睇法、意見。以「人類最好嘅朋友」嚟形容，亦有啲產品用狗做招牌，例如：Hush Puppy 鞋。重有幾隻牌子嘅煙同朱古力叫 Laika，紀念第一隻上太空嘅狗 Laika。但中文裏面有唔少同狗有關嘅負面詞：狗仔隊、門口狗、狗賊、狗官、搖尾忔憐…

狗係中國嘅十二生肖之一，排尾二。

嚮以前嘅唐人社會，相信狗肉係食物，重可以補身添。「狗肉滾幾滾，神仙都企唔穩」。而家好多地方，食狗肉係犯法，要坐監嘅。

話人係狗係侮辱。例如清朝鷹犬、港英黃皮狗、癲狗。

十二生肖
鼠 \| 牛 \| 虎 \| 兔 \| 龍 \| 蛇 \| 馬 \| 羊 \| 猴 \| 雞 \| 狗 \| 豬