英王愛德華八世

出自維基百科,自由嘅百科全書
跳去: 定向搵嘢
英王愛德華八世

英王愛德華八世(Edward VIII of the United Kingdom,Edward Albert Christian George Andrew Patrick David,1894年6月23號1972年5月28號)係英國國王、英屬海外各自治領嘅國王同埋印度皇帝,1936年1月繼位,同年12月退位,做咗唔夠一年。愛德華係唯一一個自願退位嘅英國君主。

1937年佢被封為溫莎公爵

名號[編輯]

愛德華八世全名愛德華‧阿爾拔‧克里斯蒂安‧佐治‧安德魯‧博德‧大衛Edward Albert Christian George Andrew Patrick David)包含阿爺愛德華七世、阿公(丹麥國王)、老頭嘅名同埋英格蘭(聖佐治)、蘇格蘭(聖安德魯)、愛爾蘭(聖博德)、威爾斯(聖大衛)嘅守護聖者名。

繼位前,佢係羅撒西公爵科沃爾公爵威爾斯親王殿下(又叫威爾斯太子)。

在位期間,佢嘅全稱係聯合王國國王、英屬海外各自治領土國王同埋印度皇帝。

退位後佢被封為溫莎公爵。

早年生活[編輯]

愛德華生於薩里里士滿嘅帕拉底歐式白色木屋。佢老頭係約克公爵喬治王子(後來佐治五世),係愛德華七世僅存嘅仔。佢阿媽係約克公爵夫人(後來嘅瑪利王后)。作為維多利亞女王嘅長曾孫,一出世愛德華就係約克 愛德華王子殿下。佢嘅屋企人叫佢全名最後一個字「大衛」。

威爾斯親王[編輯]

1910年5月6號佢阿爸繼位,佢自動成為康沃爾公爵、羅撒西公爵、卡利克伯爵、仁弗魯男爵、蘇格蘭外島勛爵同埋蘇格蘭嘅大管家。1910年6月2號佢又被封為威爾斯親王同埋賈斯特伯爵。喺威爾士政治家大衛‧萊特‧佐治嘅主張下,1911年受封儀式喺加納封堡正式舉行。嗰次係中世紀以來首次真正喺威爾斯舉行嘅名銜受封儀式。

軍旅生活[編輯]

第一次世界大戰期間,愛德華一到服役年齡最低要求,隨即話有興趣參軍。佢獲批准入伍,同英國護衛隊一齊服役。雖然愛德華話願意上前線做嘢,但英國政府唔畀,怕王位繼承人受傷。即使係噉,愛德華見識過戰壕戰嘅可怕,又盡佢所能探望前線。雖然佢嘅角色非常有限,但就令佢受到士兵嘅愛戴。

愛情生活[編輯]

1928年,佐治五世畀咗愛德華鄰近伯克郡桑寧代爾嘅Fort Belvedere作為住宅。此後愛德華開始同一啲已婚女子發生戀情,包括弗麗達‧達德利‧沃德、佛奈斯侯爵夫人及華里絲‧康普森。康普森夫人結過兩次婚,當時重有老公恩尼斯特‧康普森

愛德華同康普森夫人嘅關係令佢同阿爸佐治五世關係惡化。愛德華嘅父母都唔接受康普森夫人,佢細佬阿爾拔王子極力慫恿愛德華另覓佳配,最有影響力嘅英國國教教會亦表示反對,但愛德華同康普森夫人嘅關係始終不變。

繼位[編輯]

1936年1月20號佢父王佐治五世駕崩,愛德華繼任英國國王,成為愛德華八世。

退位[編輯]

內文: 愛德華八世退位風波

1936年11月16號,愛德華同首相史丹尼‧鮑德溫喺Fort Belvedere見面,講出佢想同康普森夫人結婚嘅諗法。當時首相畀愛德華三個選擇︰

  1. 取消結婚嘅諗法(好明顯,愛德華唔會放棄康普森夫人)
  2. 迎娶康普森,違抗首相意願(政府好有可能會投降,但會引起憲法風波)
  3. 退位(愛德華嘅選擇

最後佢喺1936年12月10號簽署退位信,12月11號英國國會批准,愛德華八世正式退位,由佢細佬阿爾拔王子繼承,是為佐治六世

溫莎公爵[編輯]

1937年3月8號佐治六世為佢阿哥、前國王創立咗一個名銜──溫莎公爵

同年6月3號溫莎公爵同華里絲‧康普森喺法國舉行私人婚禮,英國王室成員一個都冇現身。婚禮剩低嘅一塊蛋糕喺1998年2月一個拍賣會度以29900美元成交,係至今最貴嘅蛋糕[1]

1937年,溫莎公爵伉儷去到德國納粹首領阿道夫‧希特拉嘅私人訪客。其後佢哋去法國定居。1940年8月18號,溫莎公爵俾英國政府派到巴哈馬出任殖民地總督,直至1945年7月28號

近年來,美國聯邦調查局解密嘅資料顯示,二戰前同埋期間,溫莎公爵伉儷都贊同法西斯主義。喺二戰之後亦都發表過類似言論[2]

溫莎公爵伉儷冇仔女。溫莎公爵1972年死喺巴黎,終年77。

睇埋[編輯]

參考[編輯]

Wikiquote-logo.png
維基語錄收錄咗同呢篇文相關嘅摘錄:
  1. 趣味數字補充 金錢篇. The Internet Archive. 牛津大學出版社. . 喺2014-01-20搵到;. 
  2. Britian's Nazi King?. National Geographic Channels. 
  • 溫莎公爵自傳A King's Story1951年
  • 公爵夫人的書The Heart has its Reasons1956年