賓拉登

出自維基百科，自由嘅百科全書

賓拉登（Osama bin Muhammad bin 'Awad bin Laden'，1957年3月10號—^[1]），歐美傳媒通常叫佢做「奧薩瑪賓拉登」（Osama bin Laden 或 sama bin Laden）¹。老豆係也門人，阿媽係沙地亞拉伯人^[2]。佢係也門建築大亨賓拉登家族嘅57個仔女入面排第17，佢自己就有三個老婆同十三個仔女，不過由佢結過差唔多22次婚，所以實際有幾多仔女其實無人正式計過^[3][4]。由於佢老豆支持阿富汗抗戰，1980年喺白夏瓦同阿富汗游擊隊領袖見面之後，佢就成為游擊隊最大金主，之後仲得到美國CIA喺武器、訓練設施、醫療各方面資助，喺霍斯特成立訓練中心，訓練阿拉伯志願軍加入阿富汗抗戰。1989年成立阿蓋達（al-Qaeda）基地組織，用嚟管理同服務阿富汗志願軍。佢亦利用佢出錢起嘅志願軍宿舍傳播瓦哈比派思想，由於阿富汗人都唔鍾意瓦哈比派，所以佢同阿富汗游擊隊有唔啱啞情況。但係就同普什圖人嘅塔利班理念合拍。1996年8月，佢公開宣佈，由於美國人侵佔沙地亞拉伯嘅土地，所以要向美國發動聖戰。1998年8月美國駐肯尼亞同坦桑尼亞大使館發生炸彈襲擊，美國話係賓拉登做，賓拉登因為咁而開始出名。2001年911事件發生之後，美國一口咬定係賓拉登主使，唔單止令賓拉登成為全世界家傳戶曉嘅人物，重令佢成為全世界十大懸紅最高嘅通緝犯之一。

目錄 1 簡歷 1.1 家族背景 1.2 阿富汗 1.3 科威特 1.4 蘇丹 1.5 發動聖戰 2 爭議 3 註解 4 參考

[編輯] 簡歷

[編輯] 家族背景

奧薩瑪賓拉登係葉門建築大亨穆罕默德賓拉登（Mohammed bin Awad bin Laden，1908—1967）個仔，佢係費瑟親王死黨，因為做咗幾個大工程而發跡，之後又承包晒麥加同麥地那嘅清真寺重建同擴建工程。

奧薩瑪賓拉登喺吉達阿布都阿濟茲國王大學讀企業各管理，後來轉讀伊斯蘭研究，雖然成績超群，但就一啲唔出風頭，可以話好平凡同低調。

[編輯] 阿富汗

由於同費瑟親王關係密切，所以亦算係皇族，巴基斯坦希望可以有啲有皇族身份嘅人加入抗蘇志願軍，顯示皇室對抗戰支持，拉登因為咁派咗去領導沙地分遣隊。亦因為咁而同費瑟親王熟絡咗。

而喺阿富汗嘅亞拉伯抗蘇志願軍中心係喺白夏瓦，呢度亦同時係世界穆斯林聯盟同穆斯林兄弟會嘅辦公室。呢個中心最主要做嘅嘢，係畀新加入士兵嘅服務中心，同時接受包括伊斯蘭慈善機構、沙地亞拉伯情報局、沙地紅月會、世界穆斯林聯盟、同埋嚟自唔同沙地亞拉伯親王、私人同清真寺嘅捐款，仲有美國CIA喺武器、訓練設施、醫療各方面資助，都喺晒呢度處理。呢個中心由阿布都拉阿薩穆（Abdullah Azam）渣fit，佢係約旦籍巴勒斯坦人，喺吉達讀大學時識到拉登，而拉登喺奉召去到阿富汗之後，1982年開始搬咗去白夏瓦住。

1989年阿布都拉阿薩穆同佢兩個仔一齊喺白夏瓦畀人用炸彈暗算死咗，拉登就接手晒阿布都拉阿薩穆所有嘢，佢接管咗阿薩穆嘅組織之後，成立阿蓋達（al-Qaeda）作為新嘅志願軍服務中心，由原本只係服務新加入士兵，變成服務晒所有阿拉伯志願軍同埋家屬嘅中心，令唔同志願軍聯繫埋一齊，之後喺庫納爾、努里斯坦、巴達桑都成立咗阿蓋達組織，阿蓋達喺亞拉伯話解基地，基地就係咁意思。

不過由於拉登同阿蓋達信奉瓦哈比派，而阿富汗人又好憎呢一派，所以亞拉伯志願軍喺阿富汗其實唔太受歡迎，志願軍喺阿富汗嘅主要盟友係普什圖游擊隊，拉登因為咁同普什圖游擊隊領袖歐瑪爾（Mullah Mohammed Omar）做咗死黨，而歐瑪爾後來成立咗塔利班組織。

由於同阿富汗游擊隊唔啱啞，1990年佢返返沙地亞拉伯屋企打理家族生意，同時成立基金，支援阿拉伯志願軍退伍軍人同家屬。

[編輯] 科威特

1990年8月伊拉克軍隊入侵科威特，引發海灣戰爭，拉登於是遊說皇室，喺阿富汗抗戰入面嘅亞拉伯志願軍組織民間防衛隊，捍衛科威特主權，抵抗伊拉克。但係同一時間，美國派咗五十四萬大軍去科威特打伊拉克。拉登當堂激到生虾咁跳，仲要求皇室發宗教諭令，反對非穆斯林參與科威特戰爭。

不過科威特最後仍然喺美軍支援下，成功解放。但之後有兩萬美軍仍然駐咗喺沙地亞拉伯，拉登更加係臖過借火，佢仲走去搵內政部長納夫（Naif）投訴，又鬧佢係伊斯蘭叛徒，拉登同皇室因為咁而反面。但皇室入面同樣有好多人唔妥納夫，所以拉登仍然同皇室維持關係，另外佢同沙地情報局、巴基斯坦ISI仍然維持良好關係。

[編輯] 蘇丹

1992年蘇丹首長哈山圖拉比（Hassan Turabi）發起伊斯蘭革命，拉登走咗去趁熱鬧，去到蘇丹佢又喺度猛鬧沙地皇室，結果激嬲咗沙地皇室，仲將佢國籍取消。拉登因為咁而開始喺蘇丹定居，但由於佢大把錢兼識得人多，所以佢喺蘇丹埋班，好多喺阿富汗抗戰時嘅亞拉伯志願軍都走去搵佢，大家都咁憎美國，同時又好唔滿意沙地皇室畀美軍留係波斯灣，不過由於高調反美，喺美國施壓下，蘇丹唯有將拉登趕走，之後拉登就去咗阿富汗。

[編輯] 發動聖戰

拉登同十幾個前亞拉伯志願軍、3個老婆同13個仔女，加埋保鑣去到阿富汗加拉拉巴，由於沙地亞拉伯將佢國籍撤銷咗，而有份參與海灣戰爭嘅美國、德國、法國都將佢列入不受歡迎人物，而阿富汗人又對佢無好感，所以開頭佢只係喺伊斯蘭議會保護之下，有限度咁活動，可以話乜都搞唔到。直到1996年，塔利班攻陷阿富汗首都喀布爾，成為阿富汗執政政權，加拉拉巴亦受到控制。拉登同塔利班領袖歐瑪爾一早已經係老友，拉登開始受到塔利班保護，同時，佢開始畀錢支助索馬利亞、蘇丹、埃及、葉門同阿富汗嘅恐怖份子訓練營。1996年8月，佢發表宣言，話要向美國發動聖戰，認為美國佔領咗沙地亞拉伯，喺宣言入面話：「只有鎗林雨彈先可以清洗呢啲羞辱」。拉登同佢嘅阿蓋達組織以堪達哈為基地，又再度活躍返，仲成為全世界好多激進組織嘅網絡中心。

1998年2月23號，拉登同佢嘅阿蓋達組織加埋相關團體發表一份叫《反猶太與十字軍聖戰國際伊斯蘭陣線》嘅聯合宣言，指「美國佔領伊斯蘭土地同神聖嘅亞拉伯半島，掠奪財富兼羞辱民眾，將半島變成打擊穆斯林嘅基地。」之後又發諭令，話要殺晒所有美國人同佢哋嘅盟友，唔理平民定軍人都照殺，唔理你喺邊個國家，只要有機會都要奉行諭令。

結果，喺1998年8月，美國駐肯尼亞同坦桑尼亞大使館發生炸彈襲擊之後，一連串針對美國嘅恐怖襲擊展開，其中包括舉世震驚嘅2001年911事件。

[編輯] 爭議

[編輯] 註解

[編輯] 參考