主日學

出自維基百科,自由嘅百科全書
Jump to navigation Jump to search

主日學英文Sunday school)係基督教教會主日(通常係星期日)朝早喺教堂或其他地方進行嘅宗教教育,通常喺主日崇拜之前或之後舉行。主日學嘅形式多元化,每間教會都有唔同,內容多數以查經、教授基本《聖經》內容為主,並由教會指定嘅小組組長、執事、傳道人或牧師負責任教。

由來[編輯]

主日學嘅設立,源於十八世紀英國有好多貧窮工人家庭無法為仔女提供教育同照顧。有一個叫雷克士(Robert Raikes)嘅信徒,有一日佢喺工廠附近睇見一班細路喺度玩。佢哋都係工廠女工嘅仔女,父母為咗生活,唔能夠照顧佢哋,任由佢哋喺外面玩,或者淪為廉價童工,有啲喺街頭成群結黨搞事。雷克士見到呢班細路嘅需要,決意為佢哋提供教育嘅機會。

1780年,雷克士聘請咗四位女教師,以每日一先令為謝禮,開始利用主日崇拜前後嘅時間,教導六至十四歲嘅細路識字、學習聖經,並培育佢哋嘅品德同待人接物嘅態度,亦間接噉照顧佢哋。雖然佢哋每個禮拜只可以上一日,但係佢哋嘅行為已經有改變。城裏面嘅警察同雷克士講,細路已經冇再打交同偷嘢。

三年之後,雷克士喺雜誌分享主日學嘅故事同三年嚟推行主日學嘅經驗。隨即有好多教會開展主日學教育事工,成為主日學運動嘅開頭。其後主日學邁進美國教會,再由美國教會推動發展到世界各地,至今已經有二百幾年歷史。藉住主日學,興起咗無數嘅信徒同領袖[1]

參考[編輯]