九同章
九同章（粵拼：gau2 tung4 zoeng1），全稱係九同章絲綢商店、九同章棉布商店，原係廣東省廣州市內嘅一家知名紡織品商家，喺光緒31年（1905年）創立，早期為廣州人帶來咗江浙嘅絲綢產品。九同章品牌宜家由廣州市綸章商貿有限公司（前身廣州市紡織品公司）持有，綸章、信孚等幾個老品牌亦畀呢個公司持有[1]。
光緒三十一年（1905）創立初名九同章綢緞店，初設喺惠愛街（現中山五路）。到咗1928年鋪頭做唔落，九同章連招牌鋪位，頂手畀曬梁志生同歸僑同鄉梁仁軒、梁鎮南等人，跟著九同章就慢慢聲名鵲起[2]。1930年陣九同章搬咗去高第街，擴大埋經營。1930年代初絲綢行業都係用紙張來包裝商品，而九同章就用咗厚牛皮紙做成手挽紙袋，兩面印埋舖頭名、地址等等。除咗做絲綢布匹生意，兼做加工西服、出租男女結婚禮服、婚喪喜帳同祭帳[3]。中日戰爭廣州淪陷期間，梁志生將生意移咗去香港，到1950年代初期，「九同章」先後共有過四間鋪，包括咗廣州高第街嘅九同章、廣州上下九嘅同章、上海嘅永章，同埋香港嘅老九章。
1956～1958年畀公私合營，昌第、華章等30幾間棉布鋪先後入埋九同章，合成咗公私合營九同章棉布商店，做絲綢、棉布、床上用品等生意。九同章公私合營後，成咗廣州市紡織品公司屬下嘅單位，九同章東主梁志生試過將啲資本轉入華僑投資公司，重被安排過到廣州市絲綢公司工作。文革期間，九同章改名成為民棉布商店，到1976年先至恢復返九同章嘅招牌。