井欄樹

出自維基百科,自由嘅百科全書
Jump to navigation Jump to search

井欄樹(英文:Tseng Lan Shue)係香港新界西貢區嘅一個地方,位置喺將軍澳西北、飛鵝山東南同埋大上托隔離嘅清水灣道沿線一帶,九龍觀塘區四順安達臣道以東,壁屋同埋白石窩以西。喺1866年,「井欄樹」呢個名已經喺英國人出版嘅地圖裡面出現。井欄樹喺1960年代被旅行人士稱之為「小夏威夷」。

井欄樹村[編輯]

井欄樹村係坑口鄉轄下一條村,係井欄樹嘅主要聚居地,村民多為客家人,全盛時達二千幾人,以「邱」或「丘」姓為主。村民話呢條村始建於清朝雍正年間,而村內現存嘅邱氏祠堂就顯示喺清代道光九年(1829年)建立。井欄樹村嘅村名係因為「地形似樹木茂盛」而得來。

2011年12月中(農曆十一月),條村嘅邱氏井溪雲龍堂舉辦三十年一次嘅井欄樹安龍清醮以祈求村運亨隆。每三十年舉行安龍清醮,隨咗周期比較長,唔易重覆參與外,同昔日客家喃嘸師傅主持嘅儀式,包括男扮女裝作法事、上刀梯同埋唱歌等(可參考《西貢歷史與風物》中第120頁嘅介紹),喺香港傳統圍村比較少見,所以特別吸引大家注意。呢屆安龍清醮由於已難搵到本地客家喃嘸,故此轉由傳統圍頭師傅負責宗教科儀,所以儀式同其他太平清醮差唔多,不過呢個安龍儀式,仍然有佢嘅特色,一連五日嘅醮會活動,由攞水至酬神,依然係好熱鬧。