人狗關係

人狗關係可以追溯到15000年前喺德國波恩 Oberkassel 發現一隻狗同兩個人一齊合葬。長久以嚟，狗都被稱呼為「人類最好嘅朋友」，用來形容狗對人類嘅陪伴同埋忠誠。生物學上有啲學者亦會話人狗關係係屬於生物學上嘅互利共生。

史

人同狗之間連結首先由 Boris Levinson 確定，而Boris Levinson係知名於無意中發現寵物治療嘅科學家。嗰陣佢發現有啲唔肯同人溝通或者有社交障礙嘅小朋友，會同佢隻狗Jingles有正面嘅互動。而佢嘅發現後來就畀Sam and Elizabeth Corson，兩位專門研究寵物治療嘅先驅科學家進一步確定。喺1983年，科學家Leo K. Bustad喺維也納一個學術會議發表咗一個關於人類同寵物之間關係嘅演說，確立咗「human–animal bond」呢個學說詞語。自此之後，科學界就越來越多關於人狗關係嘅研究。

人類寵物

喺世界各地，都有好多人將狗當做寵物，甚至係自己屋企人。其中金毛尋回犬，拉布拉多尋回犬都係非常受歡迎作為寵物嘅犬種。

養狗做寵物，可以話係一個跨階層種族嘅人類行為。例如，台灣總統蔡英文就喺2016年領養咗三隻退役導盲犬，仲時不時帶佢哋同傳媒見面。

支援人類生活嘅角色

一隻戰鬥追踪狗同佢嘅管理者

狗喺1970年代開始，就喺唔同嘅位置幫助人類。例如，有研究指出狗嘅嗅覺好犀利，可以感受到人類嘅恐懼，擔心同埋信心。所以，狗有時會用變身幫助視障人士，行動不便，或者有其他醫療需要嘅人類。喺部分醫院，有狗狗幫助嘅治療亦會被叫做動物輔助治療（animal-facilitated therapy, AFT）。呢啲治療會用到一啲受過訓練同埋得到認證嘅動物作為患者康復計劃嘅一部份，而且已經可以提供更好痊癒嘅環境，減少心理不安嘅症狀，辨認癌症患者，提供病發預警同埋辨認過敏症狀。

狗亦可以安撫人類情緒，有時會出現喺安老院，大學或者其他地方。例如，香港大學圖書館就有一隻叫Jasper嘅英國古代牧羊犬，擔任治療犬角色，喺大學幫助同學舒緩考試壓力。港大仲同佢整咗一張職員證。面對孤獨，抑鬱或精神病困擾嘅人，見到呢啲治療犬，好多時都會搵到安全感。不過，呢啲提供情緒支援嘅狗狗，一般就唔需要特別嘅篩選或者訓練。

獲頒發人類證書嘅狗狗

内文：獲頒發人類證書嘅非人類動物

有一啲動物會基於唔同嘅原因獲頒發一啲本來應該比人類嘅證書。好多時候呢啲都係用來證明頒發嘅學校係野雞大學，但亦有一啲院校係基於幽默感去頒發學位畀動物。

對人類文化嘅影響

• 由於啲人真係太錫啲狗狗，當佢哋好似人咁，有啲人會稱呼狗狗做「汪星人」。
• 拔布奇諾係一啲西方國家嘅咖啡店入面，提供俾狗狗嘅嘢飲。
• 2016年，美國藝術家凱倫‧查克因為拍攝咗一批食物同狗仔嘅對比圖，而呢啲圖成為網絡迷因，因而得到一啲關注。