伊利沙伯二世
| 伊利沙伯二世 | |
|---|---|
 伊利沙伯二世 (2012年) | |
| 大不列顛及北愛爾蘭聯合王國 同其他英聯邦王國女王：
| |
| 在位 | 1952年2月6號 — 2022年9月8號 |
| 前任 | 佐治六世 |
| 繼任 | 查理斯三世 |
| 配偶 | 愛丁堡公爵菲臘親王 |
| 父王 | 佐治六世 |
| 母后 | 伊利沙伯王太后 |
| 出世 | 1926年4月21號 |
| 出世地 |  英國英格蘭倫敦梅費爾布魯頓街17號 |
| 死 | 2022年9月8號（96歲） |
| 死地 | 英國蘇格蘭鴨巴甸郡芭摩盧城堡 |
伊利沙伯二世（英文：Elizabeth II，1926年4月21號—2022年9月8號），原名伊利沙伯·亞歷珊卓·瑪麗（Elizabeth Alexandra Mary），係英國君主、其他英聯邦王國君主、同埋英聯邦嘅元首，響1952年2月6號登基，繼承老竇佐治六世嘅王位[1]，成為英國、加拿大、澳洲、紐西蘭、南非、巴基斯坦同錫蘭女王。在位幾十年蒞，以佢為元首嘅國家隨住去殖民化浪潮有所增減，曾經係英、加、澳、紐同其他十一個喺佢登基後獨立嘅國家，包括牙買加、巴哈馬、格林納達、巴布亞新畿內亞、所羅門群島、圖瓦盧、聖露西亞、聖文森、伯利茲、安提瓜巴布達同埋聖傑氏尼維斯[註 1]嘅女王，其餘國家則改制為共和國，廢除咗佢作為君主嘅地位。佢亦都係英國國教會嘅最高首領。香港人稱呼佢做英女皇[註 2]或者事頭婆[註 3]。
早年
[編輯]
1926年4月21號凌晨兩點四十分，伊利沙伯響倫敦梅費爾布魯頓街17號出世，係約克公爵亞厘畢王子同老婆伊利沙伯共同嘅第一個細路。佢出世嗰陣，國王係阿爺佐治五世，阿嫲就係王后瑪麗；而阿公係貴族，第十四代斯塞莫同京荷恩伯爵克勞德·鮑斯ー利昂。佢當時係英國王位第三順位繼承人；雖然當時伯父愛德華未結婚，但愛德華好後生，啲人都預佢第日會結婚生仔，所以伊利沙伯登基做女王嘅可能性唔大。
同年5月29號，佢響白金漢宮由約克大主教Cosmo Gordon Lang受洗。佢個名「伊利沙伯·亞歷珊卓·瑪麗」其實都係跟屋企人嚟命名：「伊利沙伯」嚟自佢阿媽，「亞歷珊卓」嚟自太嫲亞歷珊卓王后，而「瑪麗」就係跟據阿嫲王后瑪麗。
登基
[編輯]
原本佢作為國王佐治五世嘅二仔嘅女，本身佢無望繼位，而阿爺佐治五世亦唔希望佢繼位（佢響臨走前話：「我求上帝，希望我個仔愛德華唔好同啲乜嘢女人結婚，而伯堤（佐治六世個花名）同莉莉畢（伊利沙伯二世個花名）唔會同王位有任何關係」）。
但最後一語成讖，伯父愛德華八世響登基無耐就堅持要同華里絲·辛普森結婚，英國聖公宗唔同意國王同一個離過婚嘅女人係埋一齊，結果愛德華八世退位。老豆佐治六世響極其唔情願嘅情況下登基。因為佢本身冇兄弟，先至可以成為王位第一繼承人。而由於父王因病早逝而亦令佢芳齡繼位，而家伊利沙伯二世已經超越太太嫲維多利亞女皇，成為英國史上做得最耐嘅君主[3]，兼且係英國最長命君主。2016年泰國蒲眉王過身後，佢做咗當今全世界在位最耐嘅國家元首，2022年9月8號，佢喺蘇格蘭巴摩盧城堡與世長辭。
政治權力
[編輯]女王名義上嘅權力遠大過實權。英國政府同加拿大政府正式名係「女王陛下政府」（Her Majesty's Government）。喺英國程序上由女王負責任命大臣，實際上依英國嘅民主憲政慣例，女王聽從首相嘅建議而唔係任意選擇大臣、官員。女王會喺首相要求下解散議會，去進行大選。而喺大選中取得勝利的政黨領袖，就要得到女王邀請先會正式拜相。首相一職一般由下議院多數黨領袖擔任，然後由首相「建議」女王任命其他內閣成員。而英國政府並唔向女王負責，而係向下議院負責，即間接噉向英國選民負責。佢亦係名義上嘅三軍統帥，但按國防大臣建議行事。女王亦參與到國家嘅司法體制中，法官名義上由佢委任，法庭以佢嘅名義行事，政府亦以女王名義提起公訴、簽發車牌同護照。所以女王唔需要車牌（雖然佢識揸車）同護照，法理上亦唔會畀人告。
由於女王長期留喺英國，佢原則上唔會，亦唔得閒參與其餘15個國家絕大多數嘅政治活動。女王會委仼由當地總理或國會「建議」嘅人選出仼總督一職，幫女王本人喺當地執行職務，亦因為女王喺嗰啲國家冇乜實際角色意義，因此嗰啲國家甚至會有民眾唔知道佢係自己國家嘅元首。
正因女王只係象徵性元首，缺乏實質政治意義，喺女王唔協調英聯邦王國外交政策下，佢喺國際衝突中嘅角色顯得矛盾。例如喺1970年代美國入侵格林納達中，佢統治嘅牙買加等七國出兵幫美國入侵同樣屬於自己嘅格林納達，但英國政府表示反對出兵，變相係「自己嘅政府反對效忠自己嘅軍隊入侵另一個由自己統治嘅國家」。
作為英聯邦元首，佢出席歷屆英聯邦首腦會議。雖然個職位唔係世襲，但英聯邦各國喺2018年嘅會議後，仍認同下一仼元首將由查理斯三世繼仼。
個人興趣
[編輯]佢係一位賽馬發燒友，英國名駒「嘉登行宮」嘅馬主就係佢本人，超過九十歲嘅佢有時重會騎馬。女王亦都鍾情於哥基犬，佢第一隻哥基犬Susan由父王佐治六世贈送，並繁殖咗十四代，自此哥基可以話陪伴咗女王大半生，包括一齊拍2012年倫敦奧運宣傳片。但由於年歲已高，佢已唔再繁殖哥基犬，最後一隻Susan嘅後代Willow喺2018年4月15號逝世，不幸消息打擊女王[4][5]。
屋企
[編輯]老豆佐治六世，阿媽伊利沙伯王太后，係貴族第十四代斯塞莫同京荷恩伯爵克勞德·鮑斯ー利昂第四個女。而佢仲有一個細妹瑪嘉烈公主。細個嘅伊利沙伯，屋企人多數會叫佢「莉莉畢」（Lilibet）。
1947年，佢同第三代表哥菲臘·蒙巴頓結婚。菲臘本身係希臘王子，為咗同佢結婚，放棄咗希臘嘅王位繼承權，以「菲臘·蒙巴頓上尉」嘅身份入門英國王室。根據慣例，佢哋嘅仔女應該要姓「蒙巴頓」；但由於阿媽伊利沙伯唔想溫莎王朝變成「蒙巴頓王朝」，所以仔女都唔跟菲臘嘅姓，而係保留溫莎王朝身份，響必要嗰陣用「蒙巴頓ー溫莎」（Mountbatten-Windsor）呢個姓。佢哋嘅仔女有：
註
[編輯]參考
[編輯]- ↑ 〈英国女王登基70年白金禧：伊丽莎白公主是否从小就按照女王的标准培养〉。BBC。2022-02-09。
- ↑ Bartram, Graham (2010). Flying Flags in the United Kingdom: A Guide to Britain's Flag Protocol (PDF). Flag Institute. pp. 15–16. ISBN 978-0-9513286-1-3.
- ↑ 女皇在位63載 成英最長久君主
- ↑ 〈英女王與柯基犬的一世情緣〉 (中文)。中時電子報。
{{cite news}}: Cite has empty unknown parameter:|coauthors=(help) - ↑ Queen Elizabeth II Loses Her Last Corgi, Willow, Marking The End Of A Scrappy Canine Dynasty