伶盜龍屬
伶盜龍屬（屬名：Velociraptor，拉丁文意思係「敏捷嘅賊仔」），通常俾人錯誤翻譯做速龍又或者係迅猛龍，係蜥臀目獸腳亞目馳龍科恐龍嘅一屬，大約生活喺7,500萬至7,100萬年前嘅白堊紀中晚期，係最廣受一般人熟悉嘅恐龍之一。
伶盜龍之所以為人熟悉，主要原因係佢哋係《侏羅紀公園》電影入面嘅重要角色。好多人甚至將戲入面錯誤翻譯嘅「速龍」又或者係「迅猛龍」一詞嚟代指原本嘅伶盜龍。但事實上，伶盜龍嘅大細大約相當於一隻火雞，明顯細過小說同電影入面經過基因修改嘅爬行動物形象。
伶盜龍嘅形象亦有出現喺其他領域嗰度。例如，NBA球隊多倫多速龍（英文：Toronto Raptors，又一個錯誤翻譯例子）就係以伶盜龍命名。
 |