假戰

出自維基百科,自由嘅百科全書
Jump to navigation Jump to search
假戰
第二次世界大戰西方戰線嘅一部分
日期: 1939年10月—1940年4月
地點: 馬奇諾防線齊格菲防線
結果: 法國戰役
參戰方
同盟國
Flag of France.svg 法蘭西第三共和國
 英國
軸心國
Flag of Germany (1935–1945).svg 納粹德國
英國國土安全部喺假戰期間使用嘅海報

假戰(英文:Phoney War),怪戰(法文:Drôle de guerre),又叫靜坐戰(德文:Sitzkrieg),係指1939年9月到1940年4月之間,雖然因為納粹德國入侵波蘭所以宣戰,但係實際上雙方得極輕微嘅軍事衝突。

呢段期間雙方有小規模嘅空中同海上嘅衝突,英國開始將遠征軍調去法國,法國就開始進行一啲動員嘅工作。1940年初法國有14個師防守馬奇諾防線,同時有80個師喺後方支援,英國陸續增援到9個師嘅部隊到咗1940年5月英法集結咗超過3,100架戰車同2,000多架戰鬥機

當時德軍同波蘭交戰緊嘅得少量軍隊守喺同法國交接嘅齊格菲防線,喺另一邊嘅馬奇諾防線,英法聯軍同德軍相對,但只係爆發零星交戰。英國皇家空軍向德國投擲宣傳單,加拿大軍隊都踏上咗英國,但係西歐喺7個月之間並冇任何戰爭,直到兩個陣營終於喺北歐戰役中爆發衝突,結束咗呢一段冇戰爭嘅宣戰期。喺重整軍備期間,英法除咗靠本身嘅生產之外,都向美國買咗大量武器。美國作為非參戰國,向英法租借同畀折扣出售武器。但係喺1930年代,英美嘅私人公司曾經隱瞞政府,向德軍提供咗武器,德軍戰機嘅引擎喺英國整,原材料就喺美國買。德國為咗阻止呢場跨越大西洋嘅交易,觸發咗大西洋戰爭

薩爾衝突[編輯]

內文: 薩爾衝突

1939年9月,喺純政治考量下,法軍向國際聯盟轄下嘅薩爾推進咗3英里。法軍動用咗98個師同2,500架坦克,而德軍動用43個師,冇坦克。

冬季戰爭[編輯]

內文: 冬季戰爭

喺西歐假戰期間,蘇聯喺1939年11月30號入侵芬蘭,東歐爆發咗冬季戰爭。普遍輿論都支持民主國家芬蘭,由於芬蘭嘅抵抗似乎比波蘭對抗德軍更加成功,英法國民甚至要求政府支援芬蘭對抗強大嘅蘇聯。於是,蘇聯俾人踢出國際聯盟,英法兩國曾經計劃遠征斯堪的納維亞。英國開始征召軍隊,但喺冬季戰爭完咗之前都未去到芬蘭,就改喺威悉演習行動中支援挪威。1940年3月,冬季戰爭完咗後,法國總理達拉第因為支援芬蘭失敗而引咎辭職。

德軍入侵丹麥、挪威[編輯]

內文: 威悉演習行動

同盟國公開討論遠征斯堪的納維亞北部,但係得唔到中立嘅北歐國家同意;2月嘅阿爾特馬克事件影響咗德國嘅鐵礦供應,德國就強烈要求守住挪威海岸。4月9號,德國發起「威悉演習行動」,開始入侵丹麥同挪威,丹麥好快就輸。4月12至15號其間,盟軍登陸挪威,但係德軍喺2個禮拜之內佔領咗整個挪威,將盟軍驅逐出境。

英國變天[編輯]

內文: 挪威爭議

英國因為支援芬蘭失敗,而改成支援挪威,帶來嘅災難令英國首相張伯倫下議院受到攻擊。雖然下議院以281票同意對200票反對通過咗對張伯倫政府嘅信任動議,但係好多支持者都轉投咗反對票。張伯倫覺得冇嗮支持,好難繼續領導英國政府或另組聯合政府,就喺5月10號辭職。英國國王佐治六世委任反對綏靖邱吉爾出任首相。邱吉爾重組聯合政府,包括保守黨工黨自由黨同一啲無政黨人士。

當日,即係英法對德宣戰之後8個月,德軍進攻比利時荷蘭盧森堡,假戰完咗。

影響[編輯]

假戰係二戰時期西方綏靖主義嘅延續。佢令法西斯嘅侵略野心進一步擴大,削弱咗同盟國嘅力量,間接導致法國淪陷。

睇埋[編輯]